Әбиба – Гран-при чемпионы!
<p style="text-align: justify;">Дзюдо шебері Әбиба Әбужақынова Аустрияда өтіп жатқан Гран-при жа­рысында чемпион атан­ды. Қазақстан дзюдо федерациясы баспа­сөз қызметінің хабарлауынша, ол финалда жапониялық Сачио Ёшиномен белдесіп, айқын басымдықпен жеңіске жетті.</p>
Әйелдер арасында 48 килоға дейінгі салмақ дәрежесінде белдескен жерлесіміз іріктеу кезеңінде Мизуки Хараданы (Жапония), ширек финалда Спрингер Жаклинді (Аустрия), ал жартылай финалда Амбер Херсьесті (Нидерланд) ұтты.
Бұл – Әбиба Әбужақынованың жаңа маусымдағы алғашқы жарысы әрі алғашқы алтыны. Бұған дейін ол Үлкен дулыға турнирінің 4 дүркін қола жүлдегері, 2023 жылы Португалияда өткен Гран-при жарысында топ жарған болатын. Сонымен қатар жерлесіміз бұған дейін әлем чемпионаты мен Азия ойындарынан қола жүлде олжалаған еді. Қоржынында құрлық додасының күмісі мен қола медалі де бар.
Аустрияда дзюдодан өтіп жатқан Гран-при кезеңіне әлемнің 52 елінен 416 балуан қатысып жатыр.