«Birlik» биі
<p style="text-align: justify;">Еліміздегі алғашқы көпұлтты «Birlik» ән-би ансамблі Ақтауда өткен «Түркі биінің ырғағы» халықаралық фестивалінің сахнасында өнер көрсетті. Әртістер әйгілі «Қара жорғаны» билеп, көрермен де қосыла кетті.</p>
«Birlik» ансамблімен бірге фестивальға тағы сегіз шығармашылық ұжым қатысты. Олар – әр ұлттың рухы мен дәстүрін сахнада бейнелеп жүрген жандар. Халықаралық ТҮРКСОЙ ұйымының Бас хатшысы Сұлтан Раев атап өткендей, бұл фестиваль – тәжірибе алмасу мен шабыттануға, ортақ мәдени құндылықтарды бөлісуге мүмкіндік берген ерекше алаң болды. Іс-шара биыл Ақтауға берілген «Түркі әлемінің мәдени астанасы» мәртебесі аясында өтті.
«Birlik» ансамблі былтыр құрылған болатын. Ұжым құрамына кастинг нәтижесі бойынша іріктелген 20 үздік биші мен музыкант енді. Шығармашылық топтың басты мақсаты – әлем халықтарының мәдени мұрасын сақтау және насихаттау, дәстүрлі музыка мен биді көпшілікке таныту. Ансамбльге халықаралық байқаулардың лауреаты Анель Марабаева жетекшілік етеді. Сондай-ақ қойылымдар мен хореографиялық композициялар дайындау барысында тәжірибе алмасу үшін жақын шетелдерден танымал хореографтар шақырылады.
Биыл Ақтауда 30-дан астам халықаралық мәдени және шығармашылық бастама өткізу жоспарланған. Атап айтсақ, фестивальдар, ғылыми конференциялар, көрмелер мен байқаулар ұйымдастырылады. Аталған іс-шаралар түркі әлемі елдері арасындағы мәдени ынтымақтастықты дамытуға зор үлес қосады.