«Ақылды жасыл ферма» көмектеседі

Жобаның мақсаты – екі ел уни­верситеті арасында әріп­­­тестік байланыс орнатып, ғы­лыми тәжірибе алмасу. Сондай-ақ агро маманды­ғында оқитын студенттерге органикалық жолмен өнім алудың тың тәсілін үйрету. Іс-шараға университет ұжымы мен Кореядан келген қонақтар және жергілікті кәсіпорындардың өкілдері қатысты.

Әсіресе бұл кездесу біз­дің агроөнеркәсіп кешені өкіл­де­рінің қызығушылығын туғыз­ды. Себебі табиғи өнім өндіру арқы­лы отандық тауардың сапасын арттыра аламыз. Сондықтан шым­кенттік кәсіпкерлер «Ақыл­ды жасыл ферма» жобасына айрықша назар аударды. Бұл жоба арқылы студенттер ғана емес, бизнес өкілдері де осы бастама шеңберінде тәжірибе алмасуға болады.

М.Әуезов атындағы ОҚЗУ басқарма төрағасы-ректор Дар­хан Ахмед-Заки Мем­лекет басшысының қолдауымен отандық ғылым жаңаша серпін алғанын атап өтті.

«Қазір біздің ғалымдардың белсенділігі жоғары. Олар серік­тестерімен бірлесіп, жаңа ғылыми жобаларды іске асыру­ға септесіп жатыр. Бұдан екі жыл бұрын профессор Рае Квон Чунг «жасыл энергияны» пай­даға жарату арқылы ауыл шаруашылығын дамытуға болатыны туралы ұсыныс білдірген еді. Нәтижесінде, биыл инвес­тормен бірге жаңа технология­ны қолдана отырып, «ақылды ферманы» біздің университетте қалыптастырсақ дейміз. «Ақылды жасыл ферманың» өнімдерін өсіруде пестицидтер, химиялық заттар пайдаланылмайды. Сондай-ақ осы жүйе аясында 90 пайызға дейін суды үнемдеуге болады», деді ол.

Іс-шара барысында ферма құрылысының іргетасына капсула салу рәсімі өтті. Бұл ке­шенде жасыл мақта, васаби мен құлпынай өсіріледі. Про­фес­сор Рае Квон Чунг фермада өндірілетін жасыл мақтаға ерекше тоқталды. Оның айтуын­ша, бүгінгі таңда жоғары сортты өнімге Луи Ветон секілді әлемдік брендтік фирмалар қызығушылық танытып отыр екен. Ал оған қажет құрал-жаб­дық­ты кореялық компания өз есебінен жеткізеді.

ШЫМКЕНТ