Іленің бойын тазартты
<p style="text-align: justify;">Іле өзенінің маңы – табиғаты көркем, туристер жиі баратын аумақ. Алайда кейінгі жылдары бұл аймақ демалыс орны емес, бейберекет шашылған қоқыстың ортасына айналды. «Көшпелілер қаласы» мен «Тамғалы тас» шатқалының маңында пластик бөтелкелер, дорбалар, консерв қалдықтары мен құрылыс материалдары үйіліп жатыр. Жауапсыз демалушылар мен бақылаусыздықтың кесірінен Іле экожүйесіне нақты қауіп төніп тұр.</p>
Осыған орай «Amanat» партиясының қатысуымен Алматы облысында «Таза Қазақстан» акциясы аясында ауқымды экологиялық сенбілік ұйымдастырылды. 600-ге жуық адам жұмылдырылған тазалық шарасының нәтижесінде өзен жағасынан 30 тоннадан астам қоқыс жиналды.
Жиналған қалдықтардың басым бөлігі – пластик, шыны бөтелкелер, тағам қалдықтары, құрылыстық, тұрмыстық қалдықтар. Бір күндік шарамен мәселе шешілмейді. «Amanat» партиясы бұл түйткілді облыстық экологиялық кеңесте жүйелі түрде көтеруді жоспарлап отыр. Партия бастамасымен туристік аймақтарға арнайы мәртебе беру, қоқыс алаңдарын орнату, бейнебақылау енгізу, құқық бұзушыларға әкімшілік жаза қолдану тетіктері ұсынылмақ.
«Біз табиғат ластанғаннан кейін емес, ластанбай тұрып әрекет етуіміз керек. Қазір Іле бойындағы жағдай – ескерусіз қалған аумақтың нақты көрінісі. Өзен жағасы қоқысқа көміліп жатыр. Демалушылар артынан ештеңе жинамайды. Қазан-ошақ пен тағам қалдықтары өзенге ағып, қоршаған ортаға тікелей зиян келтіріп отыр. Егер жүйелі шешім қабылданбаса, жақын арада бұл жер қайтадан қалдық астында қалады. Мәселе – қоқыстың көлемінде емес, жүйесіздікте. Бұл аумақта инфрақұрылым атымен жоқ. Қоқыс жәшігі де, бақылау да, жауапты мекеме де қарастырылмаған», деді партияның Алматы облыстық филиалының төрағасы, облыстық мәслихаттың төрағасы Қуат Байғожаев.
Бұл іске волонтерлер де белсене қатысты. «Amanat» партиясының «Жастар рухы» жастар қанатының төрағасы Медет Бекбергенов: «Жалпы, табиғатқа жанашырлық – ниет қана емес, нақты жүйелі саясатқа айналуға тиіс. Бүгінгі экоакцияға облыс әкімінің өзі бастап, мемлекеттік қызметкерлер, еріктілер, қоғам белсенділері мен «Amanat» партиясының мүшелері қатысты. Волонтерлер бұл мәселемен алғаш рет бетпе-бет келіп отырған жоқ. Былтыр өз күшімізбен осы аумақтан 10 тоннадан астам қоқыс жинадық. Бірақ бізден кейін тағы да бәрі сол қалпына түсті. Бұл – бір реттік сенбілікпен шешілетін мәселе емес. Табиғатты қорғау жүйелі бақылау мен нақты инфрақұрылымды қажет етеді. Біз қанша тазаласақ та, қоқыс тастауды тоқтатпайынша нәтиже болмайды», дейді.
Айта кетейік, экологиялық шаралар Іле өзенімен шектелмейді. Облыстың 373 елді мекенінде 80 мыңнан астам адамның қатысуымен 38,9 мың түп ағаш отырғызылып, 120 ақпараттық түсіндіру, 150 санитарлық тазалау шарасы өткізілді.
Алматы облысы