Алматы облысында жол-көлік оқиғасы көбейген
<p style="text-align: justify;">Алматы облысындағы жол-көлік оқиғасы өсімімен күрес жөніндегі жұмыс кездесуі өтті. Бас прокуратураның Құқықтық статистика және арнайы есепке алу жөніндегі комитетінің департаменті зардап шеккендермен, қаза тапқандармен орын алған барлық жол-көлік оқиғаларын (ЖКО) есепке алады, деп хабарлайды <a href="/" target="_blank" rel="noopener noreferrer">Egemen.kz</a>.</p>
Жол-көлік оқиғаларының санын азайту мақсатында комитеттің тапсырмасы бойынша облыстық прокуратура мен басқа да уәкілетті органдардың өкілдері кірген ведомствоаралық жұмыс тобы (ВЖТ) құрылды. ВЖТ заңнама талаптарын күшейту, ЖКО-ны есепке алу мен тіркеуді жетілдіру, сондай-ақ алдын алу және ескерту шараларын іске асыру бағытында жұмыс жүргізуде. Бұл – жол қозғалысы қауіпсіздігін арттыруға бағытталған кешенді тәсіл. Өйткені, өңірдегі жағдай айтарлықтай алаңдаушылық тудыруда.
Биылғы жылдың алғашқы төрт айында Алматы облысында жол-көлік оқиғаларының саны 55,5%-ға, зардап шеккендер саны 92,3%-ға артты. Қаза тапқандар саны 28%-ға өсті, олардың ішінде 5 кәмелетке толмаған бала бар.
Азаматтардың хабардарлығын арттыру және жаңа жол апаттарының алдын алу мақсатында департамент апаттық қауіпті жол учаскелерінің интерактивті картасын әзірледі. Оған мобильді телефон арқылы QR-кодты сканерлеп қол жеткізуге болады.
Карта арқылы тіркелген ЖКО санын көруге, ең қауіпті жол учаскелерінің қай жерде орналасқанын білуге болады. (Картаны көрсету жоспарлануда).
ЖКО-ның алдын алу жұмысы Алматы облысының мемлекеттік органдарының тұрақты бақылауында.
Алматы облысы