«Томирис» Афинаны «жаулайды»
<p style="text-align: justify;">Грекия астанасы Афинада қазақ киносының күндері өтті. Мәдени іс-шара аясында Қазақстан Республикасы Мәдениет және ақпарат министрлігі мен «Қазақфильм» ұлттық киностудиясының қолдауымен түсірілген фильм­дер грек көрерменіне ұсынылды.</p>
Фестиваль бағдарламасына Қазақстан тарихы, мәдениеті мен халық батырлары туралы баяндайтын классикалық және заманауи фильмдер кірді. Кино күндері сақ патшайымы, еркіндік пен батылдықтың рәмізіне айналған Томирис туралы тарихи фильмнің көрсетілімімен басталды. Бұл туынды фестиваль қонақтары тарапынан қызығушылық тудырды. Сол себепті фильмді Грекияда прокатқа шығару мүмкіндігі туралы келіссөз жүргізіліп жатыр.
Сондай-ақ көрерменге аты аңызға айналған «Дос-Мұқасан» ансамбліне арналған кино туындысы мен «Қазақфильм» қайта қалпына келтірген қазақ киносының классикасы «Менің атым Қожа» фильмі көрсетілді.
Көрсетілімнен кейін қазақстандық актерлер мен режиссерлер және грек киноөндірісінің өкілдері қатысқан шығармашылық кездесулер мен пікірталастар ұйымдастырылды. Фестивальге қатысушылардың пікірінше, мұндай мәдени алмасу жиындары – Қазақстан мен Грекия халықтарының арасындағы өзара түсіністік пен ынтымақтастықты нығайтудың тиімді жолы.
Осылайша, Афинада өткен қазақ киносының күндері грек көрерменінің ерекше ықыласына бөленіп, екі ел арасындағы мәдени байланысты одан әрі нығайта түсті.