Балалар ақылды роботпен кездесті
<p style="text-align: justify;">Астанада №109 мектеп жанындағы жазғы лагерь аясында ерекше шара өтіп, балалар «Темірбек» есімді ақылды роботтың іс-қимылын тамашалады, деп жазады <a href="/" target="_blank" rel="noopener noreferrer">Egemen.kz</a>.</p>
Қала әкімдігінің ресми сайтының хабарлауынша, заманауи жасанды интеллект элементтерімен жабдықталған «Темірбек» – сөйлеу, сұраққа жауап беру, адамды қашықтан сезу секілді мүмкіндіктерге ие. Робот STEM бағыты бойынша өтіп жатқан үйірмеге қатысып, оқушылармен еркін байланыс орнатты.
«Басты мақсат – оқушыларды болашақ технологияларына қызықтыру, осындай құрылғыларды өз қолымен жасауға ынталандыру. Мұндай кездесулер балалардың шығармашылық қабілетін дамытып, жаңа идеяларға шабыт береді», деп түсіндірді мектеп директоры Жанар Ермұхамбетова.
Ал №74 мектеп-гимназиясының информатика пәні мұғалімі Айдана Айтжанова роботтың ерекшелігіне тоқталып өтті.
«Темірбек» – мектебіміздің 7 және 11-сынып оқушылары төрт айда жасап шығарған жобасы. Қазір ол ашық сабақтар мен іс-шараларда гид ретінде белсенді қатысып жүр. Болашақта оны толық қозғала алатын, тапсырма орындай алатын деңгейге жеткізу жоспарланып отыр», деді А.Айтжанова.