Атом электр стансасының құрылысы басталды
<p style="text-align: justify;">Премьер-министр Олжас Бектенов «Росатом» мемлекеттік корпорация­сы­ның бас директоры Алексей Лихачёвпен кездесу өткізді. Онда елімізде бой көте­ретін бірінші атом электр стансасының құрылысы туралы айтылды.</p>
Әуелі Олжас Бектеновке «Росатом» корпорациясының басшысы Алматы облысындағы алғашқы атом электр стансасы құрылысының басталғаны туралы ақпарат берді.
Кездесу барысында тауарлар мен қызметтердегі отандық қамту тетіктері, жергілікті құрал-жабдықтар мен материалдарды пайдалану, сондай-ақ кадрлық әлеуетті тарту, тәжірибе алмасу мәселелері талқыланды. Ядролық-отын циклі үдерістерін локализациялау мәселелері көтерілді. Сондай-ақ жетекші отандық және шетелдік әріптестерді біріктіретін халықаралық консорциум қалыптастырудың тәжірибелік тұстары қарастырылды.
Ресей тарапы атом электр стансасы құрылысы аясында кооперацияның қажетті деңгейін қамтамасыз ете отырып, Қазақстан және басқа елдердің жеткізушілерімен ынтымақтасуға дайын екенін жеткізді.
Премьер-министр Олжас Бектенов атом электр стансасының құрылысы Мемлекет басшысының бақылауында екенін атап өтті. Үкімет жобаны жүзеге асыруға қажетті көмек көрсетеді.