Мұқтаж отбасыларға қолдау көрсетілді
<p style="text-align: justify;">Ертіс – Баян өңірінде «Мектепке жол» акциясы жалғасып жатыр. Оның аясында 12 мыңнан аса балаға материалдық жәрдем жасалады.</p>
Өңірлік білім беру басқармасының дерегінше, облыстың 12 мыңнан аса мектеп оқушысы көмекке зәру. Олардың дені – көпбалалы, аз қамтылған отбасыларда тәрбиеленіп жатқан балдырғандар.
– Акция барысында жүргізілетін негізгі іс-шаралар бар. Олар әлеуметтік аз қамтылған отбасыларға көмек көрсету, қайырымдылық шараларын ұйымдастыру. Демеушілердің есебінен оқушыларға мектепке қажетті құрал-жабдықтар, киім, аяқкиім, портфель мен кеңсе жабдықтары сатып алынып жатыр. Жергілікті білім бөлімдеріндегі әлеуметтік қорғау қызметкерлері мұқтаж отбасылардың тізімін жасайды. Мектептермен бірлесе отырып нақты көмекті қажет ететін балалар анықталады, – дейді Павлодар облысы білім беру басқармасы балалардың құқықтарын қорғау және инклюзивті білім беру бөлімінің бас маманы Самал Әлімова.
Мамандар акция барысында рейдтер жүргізіп, жәрмеңкелер ұйымдастырады. Жәрмеңкелер аудан, қалалардағы базарлар аумағында өтіп жатыр. Мұнда оқу құралдары мен киім-кешек дүкендерден әлдеқайда арзан бағада ұсынылады.
Ата-аналардың өтініштеріне жедел жауап беру үшін «жедел желілер», «сенім» телефондарының жұмысы ұйымдастырылған. Көмекке мұқтаж отбасылар тұрғылықты жері бойынша білім беру бөліміне немесе тікелей білім беру ұйымына жүгіне алады.
Павлодар облысы