Барлық мектепке ортақ бағдарлама

Жиында сөз алған Оқу-ағарту министрлігі Тәрбие жұмысы және қосымша білім беру департаментінің директоры Ерлан Қалмақов атал­ған бағдарлама бойынша тәрбие жүйесі мектеп, ата-ана және қоғам арасындағы байланысты нығай­туға бағытталғанын айтты. Ол баян­дағандай, бағдарлама 2023 жылы қанатқақты режімде басталып, 2024 жылы толықтай білім беру ұйым­дарына енгізілді. Қазіргі уақытта еліміздегі 11 мыңнан аса балабақша, 8 мыңнан аса мектеп және 700-ден аса колледж осы бағдарламамен жұмыс істеп жатыр.

«Алғаш рет бағдарлама жеке­меншік мектептер үшін де міндетті болмақ. Бұл тәрбие жұмысының ел көлемінде бірізді стандартпен жүргізілуіне, барлық оқушыға тең орта қалыптастыруына мүмкіндік береді. Өңірлерде жекеменшік мектеп мұғалімдеріне арналған оқыту семинарларының сериясы ұйым­дастырылды. Бүгінде 800-ге жуық жекеменшік мектептен 23 мыңнан аса педагог оқытылды. «Адал азамат» бағдарламасы аясында жү­зеге асырылып жатқан «Қамқор» жобасы – балалардың бойында жауап­кершілік пен экологиялық мәдениетті қалыптастыруға бағыт­талған маңызды бастама. Биыл осы жобаға 3 миллионнан астам оқушы қатысып, ел көлемінде аумақ­тарды тазалау және абаттандыру жұмыс­тарын атқарды. Сонымен қатар 185 мыңнан аса түлек «Ағаш отырғызу» челленджіне қосылып, келер ұрпаққа жасыл желекті мұра етіп қалдырды. Жобаның үздік экологиялық бастамалары Мемлекет басшысына таныс­тырылды», деп атап өтті.

Спикердің сөзіне сүйенсек, білім алушылардың мәдени-танымдық көкжиегі де кеңейіп келеді. «Балалар кітапханасы» жобасы аясында мектеп кітапханаларының қоры 2 миллионнан астам жаңа туындымен толықты. «Балалар кітапханасы» жобасы аясында ұсынылатын әдебиеттер тізімін толықтыру туралы Оқу-ағарту, Мә­дениет және ақпарат, Ғылым және жоғары білім министрліктерінің бірлескен бұйрығы бекітілді, оған 2 580 әдебиет атауы енгізілді. Мектеп кітапханаларының қоры көркем әдебиетпен толықтырылып, қазіргі таңда 141 млн данадан асты. Бірқатар мектепте күн сайын 20 минуттық міндетті оқу дәстүрі енгізілді. Сондай-ақ ел көлемінде 440 заманауи коворкинг-орталық ашылды.

«Бұған қоса елімізде ата-аналар комитетінің жұмысы қайта жасақ­талады. 2023 жылдан бастап барлық білім беру ұйымында «Адал азамат» біртұтас тәрбие бағдарламасы аясында Ата-аналарды педагоги­калық қолдау орталықтары жұмыс істейді. Осы уақыт ішінде ата-ана­лар­дың оқу-тәрбие үдерісіне қатысу деңгейі үш есеге артқан. Қазір ата-аналар комитеттерін транс­­фор­мация­­лау жұмысы жүріп жатыр, ал қараша айында «мектеп – ата-ана – қоғам» ын­тымақтастығын нығай­­­­тудың жаңа алаңына айналатын алғашқы Республикалық форум өтеді. Осыған орай Оқу-ағарту министрлігі тарапынан нақты шаралар жасалды. Ата-аналар коми­тет­­терінің төрағалары, сынып жетек­­ші­лері, директорлардың тәрбие жұмысы жөніндегі орынбасарлары, Ы.Алтынсарин атындағы Ұлттық білім академиясының, «Өркен» ұлттық балалар әл-ауқаты орта­лы­ғының сарапшылары қатары­нан жұмыс тобы құрылды», деді Е.Қалмақов.

Брифингте баяндама жасаған Ы.Алтынсарин атындағы Ұлттық білім академиясының вице-прези­денті Анар Тәңірбергенова бағдар­ламаның сапалы іске асырылуы­на әдістемелік қолдау көрсету мақсатында әдістемелік құралдар әзір­ленгенін жеткізді. Оның айтуын­ша, бұл құралдар мектептердегі директордың тәрбие орынбасар­ларына, сынып жетекшілерге қол­жетімді. Өткен оқу жылында тәрбие жұмысын ұйымдастырудың заманауи тәсілдерін талқылау, тәжірибеде тиімді қолдану жолдарын анықтау үшін білікті ғалымдар, тәжірибелі педагогтер мен қоғам белсенділері қатысты.

«Әр тоқсан сайын мектеп ди­ректорларының тәрбие ісі жөніндегі орынбасарлары, сынып жетекшілері және ата-аналар арасында сауалнамалар жүргізілді. Сауалнама тәр­бие жұмыстарының нақты, объек­­тивті жай-күйін зерделеуге мүмкіндік бер­ді. Былтырғы оқу жылында 4 мыңға тарта тәрбие орынбасары, 50 мыңнан аса сынып жетекшісі мен 300 мыңға жуық ата-ана сауалнамаға қатысып өз пікірлерін білдірді. Сауалнама нәти­жесі жалпы ел көлемінде «Адал азамат» біртұтас тәрбие бағдар­ламасы оң көрсеткіштермен іске асы­рылып жатқанын көрсетіп берді. Солтүстік Қазақстан (77%), Қос­танай (75%), Ақтөбе (75%) облыстарында, Шым-кент (74%) қаласында Бағдарламаның білім алушылардың мінез-құлқына оң әсері жоғары болды. Павлодар (86%), Ақтөбе (76%), Қостанай (77%), Жетісу (74%) өңірлерінде Бағдарлама оқушылар­дың белсенділік деңгейінің артуына ықпал етті. Сауалнамаға қатыс­қан ата-аналар бағдарламаға оң көзқарасын білдірді және оның аясында мектеппен бірлесіп жұмыс істеуге ынталы екені анықталды Ата-аналарды педагогикалық қолдау орта­­лықтарын құру нәтижесінде мектеп өміріне тартылған ата-аналардың үлесі 42%-дан 82%-ға дейін өсті», деді А.Тәңірбергенова.

Академия өкілінің сөзіне қара­ғанда, өңірлерде жекеменшік мектеп мұғалімдеріне арналған оқыту семинарларының сериясы ұйым­дас­тырылды. Бүгінде 800-ге жуық жекеменшік мектептен 23 мыңнан астам педагог оқудан өтті. Астанада Қазақстан, Азия және Еуропадан келген профессорлардың қатысуымен дөңгелек үстел өтіп, әлемдік сарапшылар «Адал Азамат: біртұтас тәрбие» атты бағдар­ламаға жоғары баға берді. Жалпы алғанда, «Адал азамат» бағдарламасы жүйелі түрде іске асырылып, педагогтердің кәсіби әлеуетін арттыруға, ата-аналарды тартуға және оқушылардың құн­дылықтық дамуына нақты ықпал етіп отыр. Бағдарламаның әлеуеті халықаралық деңгейде мойындалып, оның жас ұрпақты үлкен өмірге дайындаудағы стратегиялық рөлі айқындалды.