Көңіл тоғайтар кеңістік
<p style="text-align: justify;">Қонаев қаласының 55 жылдығына орай мәдени-спорттық іс-шаралар жоғары деңгейде аталып өтті. Жаңа нысандар пайдалануға берілді. Соның бірі әрі бірегейі келушілердің көңі­лін өсіріп, тынысын кеңейтетін сән-салтанаты келісті ­жаңа демалыс орнының қызығын қала жұртшылығы көре бастады. Жасыл желекті алаңқайда серуендеген қалалықтардың қарасы көп. Демалыс аймағы Қойшыманов – Алматы көшелерінің қиылысында орналасқан. Нысанның жалпы аумағы 6 527 шаршы метрді құрайды.</p>
Аймақ толықтай көгалдандырылған, сәндік ағаштар мен көпжылдық өсімдіктер отырғызылған. Орындықтар, әткеншектер мен ландшафтық элементтер көңіл тоғайтады. Кеңістік экологиялық, функционалдық және эстетикалық талаптарға сай жасақталуымен ерекшеленеді.
Мұнда «Өмір ағашы» атты арт-нысан айрықша көз тартады. Ол «Алтын Адам» киім үлгілерінің элементтері бейнеленген тас құрылым түрінде орындалған. Қасында осы бейнелердің тарихи маңызын баяндайтын QR-код орнатылған.
Жаңа алаңқайда жаяу жүргінші жолдары, фотоаймақтар, қоршау мен аркалық құрылымдар қарастырылған. Арнайы әзірленген тұжырымдамаға сәйкес, бұл кеңістік жай ғана демалыс орны емес, отбасылық серуен мен мәдени демалыстың мекеніне айналары анық.
Алматы облысы