Студент жасаған сусын
<p style="text-align: justify;">Маңғыстау туризм колледжінің студенті Сұлтанбек Рахатұлы шұбатты жаңа тәсілмен өңдеп, заманауи нарыққа бейімдеді. Жас өнертапқыш бұл жобаны жетекшісі Ұлпан Ілесқызымен бірлесіп жүзеге асырды.</p>
Жаңа сусын 80 па-йыз түйе сүтінен дайындалады. Құрамына түрлі жеміс-жидек қосылғандықтан, өнім дәмі өте ерекше.
– Шұбат – халқымыздың қастерлі тағамының бірі. Алайда жастар бұл өнімді әрдайым тұтына бермейді. Сол себепті оны жаңаша ұсынуды мақсат еттік. Әрі дәстүр мен заманауи дәмді үйлестіргіміз келді. Осылайша, шұбатқа киви мен құлпынай қосып, жаңа дәм жасадық. Бірнеше мәрте тәжірибе жасап, дәм үйлесімділігіне мән бердік, – дейді Сұлтанбек Рахатұлы.
Жоба авторының айтуынша, жаңа сусынның дәмін алғаш болып колледж ұжымы мен студенттер татып көрген. Кейін «Caspian» көрмесінде Маңғыстауға келген шетелдік қонақтарға да ұсынылып, оң бағасын алды. Бұл тәжірибе Сұлтанбекке өнімді нарыққа жеке бренд ретінде шығару идеясын ұсынуға себеп болды.
Қазір студент өз өнімінің атауы мен дизайнын жетілдіріп жатыр, сондай-ақ бұл идеяны патенттеуді қолға алды. Ол табиғи әрі ұлттық өнім ретінде сусынды кеңінен таныстырып, экологиялық таза, пайдалы әрі заманауи тауар ретінде нарыққа шығаруды жоспарлап отыр. «Тұтынушылар шұбаттың дәмін ұнатып, оны күнделікті өмірде тұтынса, бұл үлкен жетістік болмақ», дейді өнертапқыш студент.
Маңғыстау облысы