Өнерлі ұжым өрге басты
<p style="text-align: justify;">Түркістан қаласының ерекше мәртебе алуына орай ұйым­дас­тырылған «Өнерлі өлке» атты облыстық фестиваль қорытындыланып, жеңімпаздар анықталды. Облыстық мәде­ниет басқармасының ұйымдас­тыруымен өткен бұл айтулы іс-шара мамыр айынан баста­лып, өңірдің барлық аудан-қаласынан келген өнер ұжымдары өзара сынға түскен болатын.</p>
Түркістанның туристік әлеуетін арттыру, өңірдегі шығармашылық иелеріне қолдау көрсету мақсатында, ерекше форматта ұйымдастырылған «Өнерлі өлке» фестивалінде өнер ұжымдары ұлттық құндылықтар мен заманауи өнердің тамаша үйлесімін көрсетті. Сонымен қатар ауылдық мәдениет үйлері мен клубтардың жұмысын жандандыру бағытында «Ауыл – мәдениеттің бастауы» байқауы ұйымдастырылған болатын. Үшінші рет өткен байқауға 115 ауылдық мәдениет үйі мен клубтары қатысып, үздіктері анықталды.
«Өнерлі өлке» фестивалінде қазылар алқасының шешімімен бас жүлдеге ие болған Бәйдібек ауданы мен жүлделі орын алған Отырар және Мақтаарал ауданы өнерпаздарына қаржылай сыйлықтар мен арнайы дипломдар берілді. Сондай-ақ «Ауыл – мәдениеттің бастауы» ауылдық мәдениет үйлері мен клубтар арасында өткен облыстық байқау жеңімпаздары да марапатталды. Бас жүлдені Төлеби ауданы «Зертас» ауылдық мәдениет үйінің ұжымы иеленді. Үздік деп танылған ауылдық мәдениет үйлері мен клубтарына арнайы жүлделер мен дипломдар табысталды. Салтанатты рәсімге қатысқан облыс әкімінің орынбасары Ертай Алтаев жеңімпаз және жүлдегер аудан, қала өнер ұжымдарын марапаттады.
Айта кетелік, өңірде мәдени инфрақұрылымды дамыту бағытында биыл 4 мәдениет үйі пайдалануға берілсе, жыл соңына дейін 2 мәдениет нысанының құрылысы аяқталады.
Түркістан облысы