Музейдегі гранат
<p style="text-align: left;">Қостанайдағы геологиялық музейде жер астында жатқан 15 мыңнан астам минералдың үлгісі бар. Мөлдір шынымен қапталған музей сөрелерінің бірінде жарқырап жатқан тастың бірі – гранат. От шашып тұрған қас сұлудың қарашығындай қап-қара тас Сарыбай кенішіндегі қазба жұмыстары барысында табылған. Музейге кезінде В.Гай есімді геолог әкеп тапсырыпты.</p>
Музей меңгерушісі Вера Едігенованың айтуынша, аталған минерал Рудный маңайындағы магнетитті кеннің бойында көп кездеседі.
«Жалпы, «гранат» – латынның сөзі, дәнді тас деген мағына береді. Негізі, мұны бүршік тас деп аударса да болады. Көбіне зергерлік бұйымдарды жасауға пайдаланылады. Табиғатта бұл минералдың 5-6 түрі кездеседі. Түсіне қарай әрқайсының өз атауы бар.
Мысалы, алқызыл гранат – алмадин, қою қызылы – пироп, жап-жасылы – уваровит, ал біз көріп тұрған қап-қара гранат андрадит деп аталады. Бұл тастар, көбіне, сырға, сақина, алқа, білезік тәрізді зергерлік бұйымдарды әшекейлеуге пайдаланылады. Адамға күш-қуат беретін қасиеті де бар. Ал зергерлік бұйымдарға жарамсыздарын қатты ағаштардың бетін тегістеуге жаратады», дейді музей меңгерушісі Вера Едігенова.
Қостанай облысы