«Ақ жол арулары» әйелдер қанаты құрылды
<p style="text-align: left;">«Ақ жол» демократиялық партиясында әйелдер қанаты құрылды. «Ақ жол арулары» алғашқы республикалық форумында олардың әйелдер мен балалар құқығын қорғау, отбасылық кәсіпкерлікті дамыту, жалпы әлеуметтік салаларды дамытуға күш салатынын айтты.</p>
Форумда елдің әр өңірінен келген «Ақ жол» партиясының 200-ге жуық көшбасшы әйелі бірігіп, еліміздің қазіргі саясаты мен экономикадағы рөлін талқылады. Сондай-ақ олар әйелдер кәсіпкерлігін қолдау стратегияларын әзірлеп, әйелдердің қоғамдық-саяси өмірге кеңінен қатысатынын айтты. Форум аясында партияның Ұлттық кеңесінің отырысы да өтті. Онда Ұлттық құрылтайда көтерілген бастамаларға шолу жасалып, онда айтылған мәселелердің шешімін табуға «Ақ жолдың» әйелдер қауымы белсене кіріспек.
Қазір партия құрамының 40 пайызын әйелдер құрайды. «Ақ жол арулары» Әйелдер қанатының төрайымы, Парламент Мәжілісінің вице-спикері Дания Еспаеваның айтуынша, «Ақ жол арулары» форумы әйелдерді саясатқа тартып, қоғамдық, экономикалық тұрғыда белсенді болуға шақыратын алаң. Онда әйел көшбасшылығына үлкен қолдау көрсетіледі.
«Ақ жол» демократиялық партиясының әйелдер қанаты форумын маңызды саяси қадам ретінде қарастыру керек. Ол формалды түрдегі құрылым немесе имидждік жоба емес, бұл – әйелге деген партия көзқарасын білдіреді. Әйелдер қанаты да бұл – партиямыздағы әйелдердің Парламентпен тікелей диалог орнату арнасы, өңірлерден келіп түсетін және күнделікті өмірдегі бастамаларды қалыптастыру тетігі», деді Д.Еспаева.
Партия төрағасы, Мәжіліс депутаты Азат Перуашев партиядағы әйелдердің үлесі жоғары екенін айтып: «Қаншама мықты, білімді, тәжірибелі ер жігіттер болса, қыздарымыз одан кем емес. Олардың ортақ ісімізге қосқан үлесі ерекше», деп атап өтті А.Перуашев.