Басым бағыттар айқындалды
<p style="text-align: left;">Биыл еліміз Еура­зия­лық эко­но­ми­калық одаққа төра­ғалық етеді. Мәс­кеуде өткен Еуразиялық эко­но­ми­­­калық комиссия кеңе­сінің биылғы алғашқы отырысын аша отырып, Серік Жұманғарин Кеңес мүшелері мен бай­қаушы елдердің өкілдеріне арнап сөз сөйлеп, Қазақстан төрағалығының не­гіз­гі басым­дық­та­рын атап өтті.</p>
«Қазақстан Президенті мемлекет басшыларына жолдаған үндеуінде ЕАЭО аясындағы ортақ жұмысымыздың басым бағыттарын айқындады. 2026 жылы экономиканың түрлі саласында жасанды интеллект құралдарын енгізуге, Одақтың логистикалық әлеуетін тиімді пайдалануға, өнеркәсіп пен агроөнеркәсіп кешенін цифрландыруға, өзара саудадағы кедергілерді жоюға, сондай-ақ үшінші елдермен сауда-экономикалық ынтымақтастықты дамытуға баса назар аудару ұсынылады», деді ол.
Сонымен қатар ортақ үдерістерді толық көлемде жүзеге асырудың маңыздылығы атап өтілді. Қазір бекітілген 77 ортақ үдерістің тек 42-сі ғана нақты жүзеге асырылған. Уәкілетті органдардың ақпараттық жүйелері өзара интеграцияланбай, Одақ ішінде тауарлардың еркін қозғалысын қамтамасыз ету қиын.
Басым бағыттардың бірі ретінде «кедергісіз» транзит айқындалды. Бұл навигациялық пломбаларды кеңінен қолдануды, бірыңғай транзиттік декларацияны енгізуді және кедендік баждарды төлеуді қамтамасыз етудің біріздендірілген тетіктерін пайдалануды көздейді. Мұндай шаралар тасымал үдерісін жеделдетіп, оның құнын төмендетуге тікелей ықпал етеді.
Сондай-ақ кооперациялық жобаларды дамытуға айрықша көңіл бөлінеді. Қазір Қазақстан, Қырғызстан, Беларусь және Ресей компанияларының қатысуымен бес кооперациялық жоба мақұлданған. Негізгі міндет – кооперация қоржынын кеңейту, бірлескен өндірісті ұлғайту, жаңа жұмыс орындарын ашу және локализациялау деңгейін арттыру.
Өткізу нарықтарын кеңейту мақсатында үшінші елдермен сауда келісімдерін кезең-кезеңімен ілгерілету ұсынылды. Бұл келісімдер ЕАЭО-ға мүше мемлекеттердің бизнесі үшін тұрақты өсудің негізгі көздерінің бірі ретінде қарастырылады.