Алматыда дрифт жасаған жүргізуші қамауға алынды
<p><strong>Қала көшесінде қауіпті маневр жасаған жүргізуші ұсталып, әкімшілік жазаға тартылды. Полиция өкілдері мұндай әрекеттерге жол берілмейтінін ескертті, деп жазады <a href="/" target="_blank" rel="noopener noreferrer">Egemen.kz</a>.</strong></p>
Алматыда жол қозғалысы ережелерін өрескел бұзған жүргізуші туралы ақпаратты Polisia.kz сайты таратты.
Тәртіп сақшыларының мәліметінше, ер адам жол ережесін бұзып қана қоймай, айналадағы көліктер мен жаяу жүргіншілерге қауіп төндірген. Құқық қорғау органдары құқықбұзушылықты дер кезінде тоқтатып, жүргізушіні ұстаған.
Сот шешімімен ол 5 тәулікке қамауға алынды, ал көлігі айып тұрағына қойылды.
Медеу аудандық полиция басқармасы басшысының орынбасары Айдар Нағашыбековтің айтуынша, әлеуметтік желіге контент түсіру мақсатында көрсетілім үшін қауіпті көлік жүргізу жағдайлары көбейіп келеді.
«Мұндай әрекеттер үшін міндетті түрде жауапкершілік қарастырылған. Ешбір құқықбұзушылық назардан тыс қалмайды», деді ол.