Астанада 100-ге жуық коммуналдық қызметкер Әнұранды шырқады
<p>Мемлекеттік рәміздер күніне орай Астанадағы «Бәйтерек» монументі алаңында ерекше патриоттық іс-шара өтті. «Астана Тазалық» мекемесінің 100-ге жуық қызметкері бас қосып, Қазақстан Республикасының Мемлекеттік Әнұранын орындады, деп хабарлайды <a href="/" target="_blank" rel="noopener noreferrer">Egemen.kz</a>.</p>
Елорданың тазалығы мен көркеюіне күн сайын үлес қосып жүрген коммуналдық қызметкерлер бұл бастама арқылы мемлекеттік рәміздерге деген құрметін білдірді. Бүгінде кәсіпорында 1500-ден астам адам еңбек етеді.
Ұйым өкілдерінің айтуынша, іс-шараның басты мақсаты – патриоттық рухты нығайту, ел бірлігін дәріптеу және азаматтық жауапкершілік құндылықтарын насихаттау.
«Таза сана – таза қала» қағидатын ұстанған мекеме қызметкерлері қаланың тазалығын қамтамасыз етумен қатар, қоғамда отансүйгіштік құндылықтарды дәріптеуге де ерекше мән береді.
Іс-шара соңында ұжым отандастарымызды Мемлекеттік рәміздер күнімен құттықтады.
Еске салайық, бүгін – Мемлекеттік рәміздер күні. Бұл күн еліміздің тәуелсіздігі мен егемендігін айқындайтын ерекше мереке.