Ел аумағында ауа райына байланысты ескерту жарияланды

<p data-start="155" data-end="277"><strong>«Қазгидромет» 22 маусым күні Астана қаласы мен еліміздің 17 облысында ауа райына байланысты ескерту жариялады. Синоптиктердің болжамынша, көптеген өңірде найзағай ойнап, жаңбыр жауады, кей жерлерде бұршақ түсіп, дауыл мен екпінді жел соғады. Желдің жылдамдығы кей аймақтарда секундына 23-28 метрге дейін жетуі мүмкін, деп хабарлайды <a href="/" target="_blank" rel="noopener noreferrer">Egemen.kz</a>. </strong></p>

Сонымен қатар елдің басым бөлігінде қатты ыстық сақталады. Ауа температурасы кей өңірлерде +35...+42 градусқа дейін көтеріледі. Ең жоғары температура Қызылорда облысында күтіледі.

Абай, Ақмола, Алматы, Жамбыл, Жетісу, Қарағанды, Павлодар, Ұлытау және басқа да облыстарда жоғары және төтенше өрт қаупі сақталып отыр. Мамандар тұрғындарды өрт қауіпсіздігі ережелерін қатаң сақтауға шақырады.

Бұдан бөлек, Батыс Қазақстан, Атырау, Ақтөбе, Қостанай және Солтүстік Қазақстан облыстарында нөсер жаңбыр, бұршақ жаууы мүмкін.

Еске сала кетейік, «Қазгидромет» ұсынған болжамға сәйкес, маусым және тамыз айлары әдеттегіден ыстық болады. Қазақстан аумағында ауа температурасы климаттық нормадан 1-2 градусқа жоғары болуы мүмкін.