Жанармай тапшылығына жол берілмейді
<p style="text-align: left;">Елімізде мұнай өнімдері­нің қоры ішкі сұранысты то­лық қамтамасыз етуге жеткілікті. Премьер-министр Олжас Бектенов­тің төр­ағалы­ғымен өт­кен кеңес­те жанар-жағар­май нарығын­дағы ахуал қаралып, мұнай өнімдерін заңсыз әкетудің жолын кесу мен ішкі нарық тұрақты­лығын сақтау жөнінде нақ­ты тапсырмалар берілді.</p>
Үкімет басшысы жауапты мемлекеттік органдар мен құқық қорғау құрылымдарының қатысуымен мұнай өнімдері нарығындағы қазіргі ахуалға арналған кеңес өткізді. Жиында ішкі нарықты тұрақты қамтамасыз ету, жанар-жағармай қорын сақтау мен мұнай өнімдерін заңсыз әкетудің алдын алу мәселелері қаралды.
Кеңесте Энергетика министрі Ерлан Ақкенженов елдегі мұнай өңдеу зауыттарының штаттық режімде жұмыс істеп тұрғанын баяндады. Бүгінде отандық мұнай өңдеу кәсіпорындары ішкі нарықтың қажеттілігін толық қамтамасыз етіп отыр.
Министрліктің мәліметінше, қазіргі таңда республикадағы бензин, дизель отыны мен авиациялық керосин қоры 1 миллион тоннадан асады. Бұл ішкі тұтынушылардың сұранысын толық өтеуге мүмкіндік береді. Жанар-жағармай материалдары ең алдымен автожанармай құю стансаларына, ауыл шаруашылығы тауарын өндірушілер мен отандық әуе тасымалдаушыларына жеткізіліп жатыр.
Кеңес барысында мұнай өнімдерін заңсыз тасымалдау мәселесіне ерекше назар аударылды. Қазір ел аумағынан автомобиль көлігі арқылы мұнай өнімдерінің жекелеген түрлері мен теміржол арқылы жеңіл дистилляттарды шығаруға тыйым салатын шектеулер күшінде қалып отыр. Бұған қоса, автокөліктердің мемлекеттік шекараны тәулігіне бір реттен артық кесіп өтуіне жол берілмейді.
Жиында Ішкі істер министрі Ержан Сәденов, Ұлттық қауіпсіздік комитеті төрағасының орынбасары – Шекара қызметінің директоры Ерлан Алдажұманов пен Қаржылық мониторинг агенттігі төрағасының орынбасары Қайрат Бижанов баяндама жасап, қабылданып жатқан бақылау шаралары туралы мәлімет берді. Премьер-министр ішкі мұнай өнімдері нарығының тұрақтылығы ел экономикасы үшін стратегиялық маңызға ие екенін атап өтті.
Олжас Бектенов жауапты мемлекеттік органдарға жанар-жағармай тапшылығына жол бермеу мен елдің қажеттілігін үздіксіз қамтамасыз ету мақсатында шекарадағы бақылауды күшейтуді тапсырды.
Сондай-ақ ҰҚК Шекара қызметіне Қаржы министрлігімен және Қаржылық мониторинг агенттігімен бірлесіп, мемлекеттік шекарадағы бақылауды күшейту, мұнай өнімдерін заңсыз тасымалдаудың барлық схемаларын анықтап, олардың жолын кесу міндеті жүктелді.
Энергетика министрлігіне мұнай өнімдерін өндіру, қор қалыптастыру мен тұтыну теңгеріміне тұрақты мониторинг жүргізу тапсырылды. Қажет болған жағдайда ішкі нарықтағы тұрақтылықты сақтау үшін қосымша шаралар жөнінде жедел ұсыныстар енгізу тапсырмасы берілді.
Осылайша, Үкімет ішкі нарықты жанар-жағармаймен үздіксіз қамтамасыз ету мен мұнай өнімдерінің заңсыз айналымына тосқауыл қою бағытындағы жұмысты күшейте түспекші. Қазіргі жағдай бойынша республикада жанар-жағармай тапшылығы байқалмайды, ал қолда бар қорлар тұтынушылар сұранысын толық өтеуге жеткілікті.