Саламат Эй-Джеймен күш сынасады
<p style="text-align: left;">АҚШ-тың PFL лигасының жартылай жеңіл салмақ дәрежесінде күш сынасып жүрген Саламат Исбуллаев кезекті жекпе-жегін 27 маусымда Сан-Диегода жергілікті жұлдыз Эй-Джей Маккиге қарсы өткізеді.</p>
29 жастағы қазақ шебері кәсіпқойлар арасындағы жарыстарда октагонға 10 мәрте шығып, барлығында айқын басымдықпен жеңіске жетті. Саламаттың ауыр соққыларынан «таяқ жегендер» қатарында Швеция, Аустрия, Өзбекстан, Қытай, Ресей, Моңғолия, Бразилияның марқасқалары бар. Мақтаулы Қап тауының қырандары да қандасымыздың қарқынына шыдас бере алмады. Тағы бірнеше бәсекелесін Исбуллаев «қылқындыру» әдісімен ұтты. Соңғы жекпе-жегін 7 ақпанда Дубайда PFL-дың экс-чемпионы, Перудың перісі Хесус Пинедоға қарсы өткізіп, оны нокаутқа жіберді.
Қандасымыздың қарсыласы өте азулы. Сәуір айында 31 жасқа толған Калифорния штатының тумасы 26 кездесу өткізіп, 24 рет мерейі үстем болды. 14 бәсекені мерзімінен бұрын аяқтады. Эй-Джей өз мансабында екі рет қана жеңілді. Оның өзінде Патрисио Питбуль мен Пол Хьюздан төрешілердің шешімімен ұтылды. Кезінде америкалық арлан Bellator ұйымының чемпионы болып, Гран-при додасында дара шықты. Осы лигада бірқатар рекорд жаңартты. Биыл 20 наурызда өткен соңғы жекпе-жегінде Макки мажарстандық Адам Боричтен ұпай санымен басым түсті.
Алдағы айқас Саламат Исбуллаев үшін тамаша мүмкіндік. Егер де өз салмағында екінші орында тұрған Эй-Джей Маккиді жеңетін болса, онда қазақ файтері келесі жекпе-жектерінің бірінде PFL-дің чемпиондық тәжіне таласуы әбден мүмкін. Саламат қазіргі кезде рейтингте алтыншы сатыда нық тұр.