Еуразияны жалғаған ықпалдастық
<p style="text-align: left;">Қытайға жұмыс са­­­па­ры аясында Премьер-министр Олжас Бектенов ҚХР Мемлекеттік кеңе­­сінің Премьері Ли Цянмен келіссөз жүр­гізіп, екіжақты эконо­ми­калық ынты­мақ­тас­тықтың негізгі бағы­­тын талқы­лады. Кез­десу сауда, инвес-тиция, көлік-логистика мен агроөнер­кәсіп сала­сын­дағы байла­ныс­ты терең­де­туге арналды.</p>
Қытай бүгінде Қазақстанның ең ірі сауда және инвестициялық әріптестерінің бірі саналады. Сондықтан Олжас Бектенов пен ҚХР Мемлекеттік кеңесінің Премьері Ли Цян арасындағы кездесу екі елдің экономикалық күн тәртібіндегі маңызды мәселелерді қамтыды.
Келіссөз барысында жоғары деңгейде қол жеткізілген уағдаластықтардың орындалу барысы қаралып, сауда айналымын ұлғайту, инвестициялық жобаларды жүзеге асыру, агроөнеркәсіп, көлік пен логистика салаларындағы ықпалдастықты кеңейту шарасы талқыланды. Олжас Бектенов еліміздің жаңа даму кезеңіне аяқ басқанын айтты.
«Қазақстан мен Қытайды өзара құрмет пен қолдауға негізделген достық пен ынтымақтастық байланыстырады. Бүгінде екіжақты қатынастар мәңгілік әрі жан-жақты стратегиялық серіктестік рухында дамып, жаңа «алтын отызжылдық» кезеңіне қадам басты», деді Премьер-министр.
Өз кезегінде Ли Цян кейінгі жылдары екі мемлекет арасындағы стратегиялық өзара іс-қимылдың айтарлықтай тереңдегенін атап өтті. «Қазақстан мен Қытай арасындағы жан-жақты стратегиялық серіктестік өзара қолдау мен тату көршіліктің үлгісіне айналды. Қытай тарапы саяси сенімді нығайтып, көпқырлы ынтымақтастықты кеңейтуге дайын», деді ҚХР Мемлекеттік кеңесінің Премьері.
Сандар да серіктестіктің ауқымын аңғартады. Былтыр екі ел арасындағы тауар айналымы 48 млрд доллардан асты. Қытайдан тартылған тікелей инвестиция көлемі 2,8 млрд долларды құрады. Агроөнеркәсіп саласындағы байланыс та қарқын алып келеді. Өткен жылы бұл сектордағы сауда көлемі 36 пайызға өсіп, 1,9 млрд доллардан асты.
Далянь қаласында өткен «Бір белдеу, бір жол» бастамасына арналған халықаралық сессияда сөйлеген сөзінде Олжас Бектенов Қазақстанның Еуразия кеңістігіндегі стратегиялық артықшылықтарына тоқталды. Оның айтуынша, республика шамамен 1,7 млрд тұтынушысы бар нарықтарға шығуға мүмкіндік береді. Кейінгі жеті жылда көлік-транзит инфрақұрылымын дамытуға 35 млрд доллардан астам қаржы бағытталған.
Ақтаудағы контейнерлік хаб, Сиань құрғақ порты, «Достық – Мойынты» теміржолының екінші желісі секілді жобалар бүгінде халықаралық тасымалдың тиімділігін арттырып отыр. Бүгінде Қытай мен Еуропа арасындағы құрлықтағы жүк тасымалының 85 пайыздан астамы Қазақстан аумағы арқылы өтеді. Өткен жылы екі ел арасындағы теміржол тасымалы 35,6 млн тоннаға жетіп, 11 пайызға өсті.
Премьер-министр бастаманы одан әрі дамытудың бес негізгі бағытын атады. Олар – инфрақұрылымдық байланыстарды күшейту, цифрлық дәліздерді қалыптастыру, жасыл технологияларды дамыту, сауда мен инвестицияны кеңейту мен қаржы құралдарын жетілдіру.
«Бір белдеу, бір жол» бастамасы өзара байланыстардың кеңеюі жаңа мүмкіндіктерге жол ашатынын көрсетті. Қазақстан өзін Қытайдың сенімді серіктесі әрі өңірлерді байланыстыратын маңызды көпір ретінде көреді», деді Олжас Бектенов.
Сарапшылардың пікірінше, қазіргі геосаяси жағдайда Қазақстан мен Қытай арасындағы сауда-экономикалық байланыстардың нығаюы көлік дәліздерінің бәсекеге қабілетін арттырып қана қоймай, Еуразия кеңістігіндегі жаңа экономикалық мүмкіндіктердің қалыптасуына да ықпал етеді. Екі елдің стратегиялық әріптестігі енді тек сауда көлемімен емес, бірлескен инфрақұрылымдық әрі инвестициялық жобалардың ауқымымен өлшенетін кезеңге қадам басып отыр.