«Ауыл» партиясындағы ауыс-түйіс

Алғашқы сөзді алған Мәжілістің Аграрлық комитеті төрағасы, депутат Серік Егізбаев «Ауыл» партиясы­ның төрағасы қызметінен кететінін мәлімдеді.

«Бүгінгі саяси сәт барлық прог­рессивті күштерден қоғамның жаңа­ру сұранысына лайықты жауап беруді талап етеді. Бұл сұраныс конс­титуциялық реформа барысын­да дәлелденді. «Ауыл» партиясы осы үдерістерден шетте қала алмайды, керісінше, партия олардың белсенді қатысушысы, ал бұл үшін аг­рарлық және әлеуметтік күн тәр­тібіне жаңа көзқарас әкелуді, жаңартылған саяси жүйеде тиімді жұмыс істеуді қажет етеді. Сондықтан партия төрағасы қызметімді тоқтатуым партияның ішкі динамикаға дайындығын, жаңа саяси жүйеде алдағы сайлауға толыққанды қатысуға ниеттілігін көрсететін заңды қадам болады», деген ол бұдан әрі де өзінің партия мақсаттарына адал әрі жаңа төрағаға партия қызметінің сабақтастығы мен тұрақтылығын қамтамасыз ету үшін жан-жақты қолдау көрсетуге дайын екенін мәлімдеді. Сондай-ақ ол партия қатарында белсенді қызметін жалғастыра бермек.

С.Егізбаев өзінің орынбасары Қайрат Айтуғановтың кандидатурасын партияның төрағасы лауазымына ұсынды.

«Қайрат Қапарұлы – аграрлық экономика, мемлекеттік қызмет пен ғылыми салада 40 жылдан аса еңбек өтілі бар жоғары білікті басшы, экономист және мемлекет қайраткері. Әр жылдары Ауыл шаруашылығы бірінші вице-министрі, аппарат басшысы, сондай-ақ Халықаралық қайта құру және даму банкі жүзеге асырған жобаның жетекшісі, «Оңтүстік» әлеуметтік-кәсіпкерлік корпорациясы» ұлттық компаниясы» АҚ басқарма төрағасы, Қарағанды облысы әкімінің орынбасары, «ҚазАгро» ұлттық басқарушы холдингі» АҚ бас­қарма төрағасының орынбасары, «ҚР Кәсіподақтар федерация­сы» республикалық қоғамдық бірлес­тігінің төраға орынбасары секілді қызметтерді атқарған», деп атап өтті.

С.Егізбаевтың айтуынша, жаңа төрағаның партиялық жұмыс­та сабақтастықты қамтамасыз етіп, алда тұрған міндеттерді іске асыруды үйлестіруге зор мүмкіндігі бар. Съезд делегаттары Қ.Айтуғановтың «Ауыл» партия­сының жаңа төрағасы болып сайл­а­нуын бірауыздан қолдады.

Сонымен қатар съезде жаңа Конституцияға сәйкес партия Жарғысына толықтырулар мен өзгерістер енгізу туралы шешім қабылданды. Сол өзгерістің бірі – партияның орыс тіліндегі атауының өзгеруі. Бұрын мемлекеттік тілде де, орыс тілінде де «Ауыл» партиясы» деп аталса, ендігі уақытта орысша «Партия «Ауыл» деп өзгеріп отыр.

Жаңа төраға Қ.Айтуғанов журналистерге берген сұхбатында өзін осы лауазымға лайық көріп, қолдап дауыс берген партияластарына алғысын жеткізді.

«Мен бұл партияға жаңадан келіп отырған жоқпын. Алты жылдан бері осы құрылым қатарындамын, үш жарым жыл төрағаның орынбасары болып еңбек еттім. Алдағы мақсаттарымызға келсек, тамыз айының басында партияның үлкен съезі өтпек. Сол жерде жаңадан құрылатын Құрылтайға партия атынан үміткерлер іріктеледі», деді ол.