Әрі тәжірибеден өтеді, әрі жалақы алады

Осы орайда елордадағы «Астана Тазалық» кә­сіпорны болашақ мамандарды өндірістік ортада даярлаудың тиімді үлгісін көрсетіп отыр. Мұнда өндірістік тәжірибеден өтіп жүрген колледж студенттері тәжірибе жинап қана қоймай, ай сайын шамамен 150 мың теңге көлемінде жалақы алады.

Қала көшелерінің тазалығы мен коммуналдық техникалар­дың үздіксіз жұмысын қамтама­сыз ететін «Астана Тазалық» мекемесінің өндірістік базасында қызу жұмыс бір сәтте толас­тамайды. Бір бокста қар тазалайтын техника жөнделсе, енді бірінде көшелерге су шашатын машиналардың агрегаттары қалпына келтіріледі. Осы жұмыстардың арасында колледж студенттері де тәжірибелі мамандармен бірге еңбек етіп жүр. Кәсіпорын шебері Нұржан Нұрсейітовтің айтуынша, студенттер мұнда жай бақылаушы емес, нақты өндірістік үдеріске қатысушылар ретінде тәжірибе жинақтайды.

– Біз колледжбен меморандум жасадық. Әдетте өндірістік тәжірибе көп жерде ақысыз өте­ді. Ал бізде студенттерге ай са­йын шамамен 150 мың теңге кө­лемінде жалақы төленеді. Олар күніне төрт сағат жұмыс істейді, сол еңбегі үшін ақы алады. Бұл жастардың мамандық­қа деген қызығушылығын, жауап­кершілігін арттырады, – дейді шебер.

Шебердің сөзінше, студенттер техникалық қызмет көрсету мен жөндеу жұмыстарының бар­лық негізгі кезеңдерімен танысады. Олар аға мамандардың бақылауымен стартер жөндеу, радиаторларды қалпына келтіру, май ауыстыру, түрлі техникалық ақауларды анықтау жұмыстарын атқарады.

– Студенттерді бірден күр­делі жөндеу жұмыстарына жібер­мейміз. Қауіпсіздік талап­тары бірінші орында. Алға­шын­да бақылап, үйренеді. Ке­йін тәжірибе жинақтағаннан кейін қа­ра­пайым жұмыстарды өздері орындай бастайды. Қазір олардың көбі техника құрылымдарын жақ­сы меңгеріп келеді, – дейді Н.Нұрсейітов.

Мекемеде тәжірибеден өтіп жатқан Астана қаласындағы кәсіптік-техникалық колледждің 3-курс студенті Әлібек Еркенов бұл өндірістік курстың өз мамандығы бойынша үлкен мүмкіндік екенін айтады.

– Түрлі техникамен жұмыс істеуді үйрендік. Щеткаларды, пы­шақтарды ауыстыруды, басқа да техникалық жұмыстарды меңгеріп жатырмыз. Көп жерде студенттер тегін тәжірибеден өтеді, ал біз жұмыс істеп қана қоймай, еңбекақы алып жүрміз, – дейді ол. – Мұндағы тәжірибе бұрын­ғы өндірістік тәжірибелерден әлде­қайда ауқымды. Техникалар көп, жұмыс көлемі де үлкен. Ше­берлер әр нәрсені егжей-тегжей түсіндіріп, іс жүзінде көрсетеді. Қазір көшелерге су шашатын техниканың тарату жүйесін жөн­деуге қатысып жатырмыз. Осындай жұмыстар арқылы нақ­ты тәжірибе жинақтаймыз.

Бүгінде кәсіпорында алты студент өндірістік тәжірибеден өтіп жатыр. Олар үш айлық өндірістік, дипломалды тәжірибе бағдарламасы аясында жұмыс істейді. Тәжірибе аяқталғаннан кейін студенттер диплом алып, еңбек нарығына дайын маман ретінде шығуды жоспарлап отыр.

Мұндай тәжірибелік бағдар­ла­маларды ұйымдастыруға кә­сіп­орынның техникалық әле­уеті мүмкіндік береді. Мекеме­нің техниканы пайдалану депар­таментінің директоры Тимур Ахметовтің айтуынша, кәсіпорын қаланың санитарлық тазалығын қамтамасыз етіп қана қоймай, болашақ мамандарды даярлауға да ерекше көңіл бөліп отыр.

– Қазірде кәсіпорын балансында 438 арнайы техника бар. Оның ішінде тракторлар, автогрейдерлер, самосвалдар, жол сыпыратын, шаңсорғыш техникалар жұмыс істейді. Техникалық паркті 2021 жылдан бері кезең-кезеңімен жаңартып келеміз. Ауқымды өндірістік база студенттердің тәжірибе жинақтауына мүмкіндік береді. Кадр даярлау – маңызды бағыттардың бірі. Өндірістік тәжірибе кезінде студенттер нақты жұмыс үдерісін көреді, техникалармен жұмыс істеуді үйренеді. Ертең олар еңбек нарығына шыққанда дайын маман ретінде қалыптасады, – деді Т.Ахметов.

Бүгінде жұмысшы маман­дық­тарына сұраныс артып келеді. Осы тұрғыдан алғанда, «Астана Тазалық» кәсіпорнының тәжірибесі студенттерге теория­лық білімді өндірістік тәжіри­бемен ұштастырып қана қоймай, еңбек жолын ерте бастауға мүм­кіндік беретін тиімді жоба ретінде бағаланып отыр.