Жауынгер кейпіндегі журналистер

Жиырмадан ас­там БАҚ өкіл­­дері жай­ғас­қан авто­бус түске қарай қала сыр­тындағы атыс алаңы­на қарай жетіп тоқтады. Әдетте, сұхбат алуға асыға­тын әріптестер бұл жолы қол­дарына микрофон емес, қару ұстады, әскери форма киіп, командирдің бұйры­ғы­мен сап түзеді. Жарыс ережесі түсіндірілген соң, үш командаға бөліндік. Қолбасшыларымызды сай­ладық. Содан кейін ғана құп алып, жарыс алаңына бет түзегенбіз.

Әуелі оқ пен оттың ортасында қалған «жаралы жауын­герді» қауіпсіз жерге алып шығу керек болды. Бұл жерде шапшаңдық керек. Әр команда өзара келісіп, ең жүйрік екеуді «майдан» алаңына жібер­ді. Жарыс шарты бойынша қаруластарын зембіл­ге салып, бәрінен бұрын келгеніне ұпай қосы­ла­ды. Тапсырманың қай-қай­сысын да шапшаң орын­дағандар ұпайдың жоғар­ғысын алып отырады. Ширақ қимылдарына қарап, жур­налистерден жап-жақсы жауынгер де шығатындай көрінді. Бұл сайыстан соң қолы епті жауынгер журналистер АК-74 автоматын шашып, қайта жинады. Күнде қару құрап жүрмесе де, норманы орындап жатқандар да болды.

«Спорттық дайын­ды­ғы­мыз бол­ға­ны­мен, әскери өмірдегі жү­гіріс бөлек екен. Десе де, бары­мызды салып жатыр­мыз. Осындай сайыс­ты ұйымдастырып жат­қан Ұлттық ұлан ұжы­мына, Журналистер ода­ғы­на рахмет айтамыз»,  дейді әріптесіміз Әділхан Есімханов.

Жарысты Ұлттық ұлан Шығыс өңірлік қолбасшылығы мен Жур­налистер одағының Шы­ғыстағы филиалы ұйым­дастырса, демеушілік көр­сетіп отырған «KAZ Minerals» компаниясы. 

Қару жинау жарысынан соң, нысанаға оқ аттық. Мергендік сыналар сәтті қыздар жағы да қалыс қал­мады. Көздеген жерге дөп тиіп жатты. Одан кейінгі сайыс тіпті қыза түсті. Бес метр жердегі нысанаға сапер күрегін лақтырып, қадау керек екен. Сәтті аяқ­та­ғандар уралап, шуласып жатса, мүлт кеткендері қап десті. Алдағы жарыста теңесерміз деп жұбатты өздерін. Келесісі бұдан да қиын еді. Төрт қабатты үйден арқанмен жедел түсу керек. Бір қарағанда, аласа болып көрінгенімен, биігінен төмен секіру үшін жүректің түктілігі, білектің мықтылығы болуы шарт. Ұрыста тұрыс жоқ деп, журналистер оған да бел шеше кірісті. Оларға қарап, әскерилер де таңданған. 

«Біздің журналис­тер жазудың ғана емес, жауын­­герліктің де шебері екен. Соны көріп қуанып тұрмын. Қай жарыста да ұйым­да­сып, ұжымдасып жеңіске ұмтылды. Мұндай жа­рысты жыл сайын ұйымдас­ты­ра­мыз», деді Ұлттық ұлан Шығыс өңірлік қол­бас­шылығының баспасөз хатшысы Бағдат Амангелді.

«Бір күн әскер сапында» жарысының қорытындысы бойынша үздіктері арнайы аталымдарға ие болып, демеуші тарап бағалы сыйлықтарын табыстады. Ал жүлделі үшінші орынды «Қыран» командасы еншіледі. Екінші орынға «Орда» командасы табан тіреді. Бірінші орынды «Арлан» алды. Бұл сайыстан ешкім сыйлықсыз кетпеді.

Шығыс Қазақстан облысы