Италияда алып акула жағажайдағы адамдарды шошытты
<p data-start="0" data-end="325"><strong>Италиядағы Жерорта теңізі жағалауында алып акула табылып, жағажайда демалушыларды шошытты. Алғашында судың астында тек көлеңке көрінген. Артынша өткір тістері ақсиған теңіз жыртқышы су бетіне шыққан. Ұзындығы шамамен 4,5 метр болатын акула осылайша демалушылардың зәресін алды, деп хабарлайды <a href="/" target="_blank" rel="noopener noreferrer">Egemen.kz</a>,</strong></p>
Алғашында қорқынышты көрінгенімен, акула ешкімге қауіп төндіре алмады. Өйткені ол әлдеқашан өліп қалған еді. Теңіз толқыны оның денесін Тоскана аймағының оңтүстік-батысындағы танымал Фоллоника жағажайына шығарып тастаған.
Мамандардың айтуынша, бұл – сирек кездесетін алтыжелбезекті доғалтұмсық акула. Ол әдетте теңіздің терең қабатында тіршілік етеді және тек түнде ғана таяз суға жақындайды. Сондықтан адамдар оны өте сирек көреді.
Жағаға жақындаған кезде суға сүңгуге арналған маска таққан бес жасар бала сапборд үстінен еңкейіп, өлі акуланың алып көздерін көрген. Әкесі жергілікті басылымға берген сұхбатында баланың қатты қорқып, жылап жібергенін айтты.
«Алдымен ол акуланың аузын көріп, «әке, судың астында алып балық бар» деді. Қатты шошып, бірден жағаға шыққысы келді, дейді әкесі.
Салмағы 500 келіден асатын акуланы жағалау күзетінің қызметкерлері қайыққа тиеу үшін екі сағаттай уақыт жұмсаған. Кейін оны жергілікті тұрғындар мен туристердің көз алдында арнайы техникамен алып кеткен.
Теңіз биологтары ұзындығы 4,5 метр болатын ұрғашы акуланы зерттегенімен, оның неден өлгенін анықтай алмады.
«Жануардың денесінде ешқандай жарақат та, шіру белгілері де болған жоқ», дейді зерттеуге қатысқан профессор.
Ал ерекше оқиғаның куәсі болған бала қазір алып акуланың үлкен көздері мен ақсиған тісін көргенін мақтанышпен айтып жүр.