Халықаралық байқаушылармен кездесті
<p style="text-align: left;">Орталық сайлау комиссиясының төрағасы Нұрлан Әбдіров ЕҚЫҰ Демократиялық институттар және адам құқықтары жөніндегі бюросы миссиясының басшысы Винсент Пикетпен кездесіп, алдағы Құрылтай депутаттарының сайлауын бақылау мәселелерін талқылады. Жүздесуге екі тараптың мүшелері де қатысты.</p>
Басқосуда Н.Әбдіров миссия мүшелерін конституциялық реформаның негізгі ережелерімен, еліміздің жоғары өкілді органын қалыптастырудың жаңа үлгісімен, жаңартылған сайлау заңнамасының негізгі жаңалықтарымен хабардар етті. Бұдан соң, Ортсайлауком төрағасы елдегі саяси науқанға дайындық барысы туралы жан-жақты ақпарат берді. Әсіресе сайлау комиссияларының жұмысын ұйымдастыру, оларды оқыту, ашықтықты қамтамасыз ету, сайлаушыларды ақпараттандыру жөніндегі шаралар, сондай-ақ қоғамдық және халықаралық байқаушылардың қатысуы туралы айтты.
Н.Әбдіров ОСК мен ЕҚЫҰ ДИАҚБ арасындағы көпжылдық ынтымақтастықты атап өтіп, миссия ұсынымдарын дәйекті жүзеге асыру маңызды бағыт екенін жеткізді.
Өзара іс-қимылымыз саяси науқан тұсында да сындарлы сипатта жалғасатынына сенімдімін. Орталық сайлау комиссиясы халықаралық байқаушылардың өз қызметін еліміздің заңнамасына әрі халықаралық міндеттемелеріне сәйкес жүзеге асыруы үшін барлық жағдайды жасайды. ЕҚЫҰ ДИАҚБ-ның қорытынды есептерінде қамтылған ұсынымдармен жұмыс жүргіземіз, деді ол.
Өз кезегінде миссия басшысы сайлаудың маңыздылығына, еліміздің ЕҚЫҰ құрамындағы айрықша рөліне тоқталды.
Қазақстан – ЕҚЫҰ құрамындағы аса маңызды әрі беделді серіктес. Ел тарихындағы алғашқы Құрылтай депутаттарының сайлауын байқауға ЕҚЫҰ ДИАҚБ миссиясын шақырғандарыңыз үшін алғыс білдіреміз. Қалыптасқан серіктестікті және жергілікті Орталық сайлау комиссиясымен жолға қойылған ашық әрі сындарлы диалогті жоғары бағалаймыз, деді В.Пикет.
Кездесу қорытындысында ОСК сайлау науқанын қатаң түрде ел заңнамасына сәйкес өткізіп, барлығына тең жағдай туғызатыны айтылды.