Жанданған жарыс

Жыл аяғы жақындап келеді. Ал белгі­ленген міндеттердің іске асырылуы қалай? Бұл жайында жақында облыс жұртшылығы кеңінен құлағдар болып қалды. Әлеуметтік-экономикалық саланы дамытуда қалалар мен аудандардың қайсысы алда екенін сараптауға арналып жүргізілген рейтингтің ағымдағы жылдың бірінші жартыжылдығы қорытын­дысында көш басындағылар анықталды. Олардың қарқынды сақтап, жыл мәресіне жақсы табыстардан тайқымай жететіндіктері байқалып отыр. Мұндағы бір жағымды жаңалық, бұған дейін төменгі, орта саптан көрініп жүретін Шах­тинск қаласы көптеген көрсет­кіш­терден жоғары деңгейімен көзге түсуде. Шах­та­лар­дағы апат, қақаған қыс орта­сында жылу бе­ру­дің тоқтап қалуы секілді қи­ындықтарды бас­тан кешкен шағын шаһарда бүгінгі жағдай танығысыз өзгеруін облыс қалалары арасында даму жағынан бірінші орынды иеленуі ай­ғақтайды. Ал аудандар ішінен Жаңаарқа өңірі қа­шанғыдай жарқын істерді жаңғыртушы ре­тін­де осы жолы тағы танылды. Әсіресе, бюд­жет­тің шығыс бөлігінің орындалуы, тұрғын­дар­дың ақшалай кірістерінің ұлғаюы, табиғи өсім бойынша көрсеткіштер көрнекті. Нұра аймағы шағын және орта бизнесті өркендету, жұ­мыссыздықты төмендету, көші-қоңды білікті ұйымдастыру қырынан көріне білсе, Қар­қа­ралы ауданы орта мектептер оқушы­ла­рының үлгерімі, қылмыстың азаюы жөні­нен озық аталды. Дамуы тұрақты өңірлер қа­тарына Ұлытау ауданының да қосылуы сүйінішті құбылыс. Рейтинг қорытындысында сондай-ақ, еліміз бойынша жоғары қарқынмен дамушы 50 аудан тобында Жаңаарқа 18-ші, Нұра 30-шы орыннан табылды. Аталған екі аймақтың бұдан да алдыңғы сапқа шығуға мүмкіндіктері бар, күш-қабілеттері жеткілікті. Сонымен қатар 14 облыстық орталық­тардың арасында Қарағанды қаласының 7-ші орынды иемденіп отырғаны осы рейтинг арқылы белгілі болған мәліметтің бірі. Соның ішінде 6 көрсеткіш бойынша, атап айтқанда, қала бюджеті шығыс бөлігінің атқарылуы, сәби мен ана өлімінің төмендеуі, 10 мың тұр­ғынға шаққанда дәрігер санының толықтығы және мектепке дейінгі мекемелермен жеткін­шектердің жаппай қамтылуы жақтарынан алғашқы үштік сапта. Бұл рейтинг қалалар мен аудандардың жарысты жандандырып, бір-бірінен озу үшін тырысуларына әсер етуде. * * *

ЕГІНДІБҰЛАҚТА ЕСКЕН ЖЫЛЫ ЛЕП

Бұрын жеке аудан болған, кейінде Қар­қаралы аймағына қосылған шалғайдағы бұл өңірге “Алтайполиметалл” компаниясы үлкен өзгерістер жасағалы жатыр. “Көктасжал” ке­нішін игерудің қолға алына бастауы жергілікті өндірістің өркендеуіне жол салмақ. Теректі ауылы маңында құрылысы ірге көтергелі тұр­ған байыту фабрикасында жылына 3 миллион тонна мыс кені өңделіп, тұтынушыларға 18 мың тоннасы ұнтақ түрінде жөнелтілетін жобаны іске асыру үшін 12,8 миллиард теңге игеріледі. Оны облысты үдемелі индустрия­лық-инновациялық дамыту жөніндегі үйлес­тіру кеңесі мақұлдап, Индустрия және жаңа технологиялар министрлігіне Индустриялан­ды­ру картасына енгізілу үшін ұсынды. Жаңа өндіріс ошағында 300-ге тарта жұмыс орны ашылады. Бірінші кезекте өңір тұрғын­дары еңбекпен қамтылады. Сонымен бірге Елбасының бизнестің әлеуметтік жауап­кер­шілігіне, әлеуметтік әріптестік мәселесіне ерекше көңіл бөлуіне сәйкес облыстық әкімдік пен аталған компания арасында қол қойылған өзара ынтымақтастық туралы ме­морандумда өңірді осы жағынан қолдау көз­­дел­ген. Соған орай “ Алтайполиметалл” ай­мақ­ты арзанда­тылған электр қуатымен қам­тамасыз етуге, өнер­кәсіпті дамыту үшін тран­зитті энергетика­лық әлеуетті құруға, тұр­ғы­лықты жастардан мамандар даярлауға атса­лы­сатын болады. Сондай-ақ егіндібұлақтық­тар­ды әлеуметтік-тұрмыстық, тұрғын үй құры­лы­сының қоса жүр­гізілмектігі қуантып отыр. Теректі ауы­лында жаңадан 100 үй, спорттық-сауықтыру кешені салынады. Теректі-Егін­ді­бұлақ бағы­тын­дағы 32 шақырымдық жол жөн­деліп, кү­тім­де ұсталады, Шарықты село­лық округінің Айыр елді мекеніне ауыз су тартылады. Аудан таратылғанда жұмыс іздеп жақын маңдағы қалаларға қоныс аударуға мәжбүр болғандардың бүгінде туған жеріне оралып жатқандары күннен-күнге көбейе түсуде. Ауыл шаруашылығымен қатар бұдан былай қарай өндірістің өркендеуі де қызықтыруда оларды. Иә, өскелең өмір лебі Егіндібұлақта да есіп келеді. Айқын НЕСІПБАЙ. Қарағанды облысы, Қарқаралы ауданы.