«#Жақсылық жаса!»

жобасын қолдаушылар қатары артып келеді Астана қаласындағы Орталық коммуникациялар қызметінде «#Жақсылық жаса!» SMM-жобасына байланыс­ты баспасөз мәслихаты өтті. Қазнет қолданушыларының ерекше қызығушылығын тудырған бұл жоба осыдан екі апта бұрын бастау алған болатын. Содан бері #Жақсылық жаса және #Делай добро хэштегтерімен әлеуметтік желілерде 100-ден аса жазба мен ролик жарияланған. Жоба жетекшісі Әсет Мұқа­жановтың айтуынша, аталған шара өткен жылы «7 арна» ұйым­дастырған «Жақсылық жаса!» атты игі істі әрі қарай жалғастыру мақсатында қолға алынған. Бұл жөнінде ол: «Негізі жақсылық жасап, біреуге қуаныш сыйлау үшін көп нәрсенің қажеті жоқ. Қоғамдық көлікте үлкенге орын беру, көлігі бұзылып қалған жүргізушіге көмектесу сынды қарапайым тұр­мыстық жағдайлардан да мейірім мен ізгіліктің үлгісін көруге болады», – деді. Ә.Мұқажановтың сөзіне қара­ғанда, ең бірінші #Жақ­сы­лық жаса хэштегімен әлеумет­тік желіге ролик жариялап, осы акцияны ұйымдастырған Мақ­сат Төлегенов есімді блогер екен. Өз кезегінде жобаны ұйым­дас­тырушы мұндай қадамға баруға не себеп болғанын айтып берді. «Бір күні кешкісін достарымызбен келе жатып, көшеден өзі қолдан жасаған азық түрлерін сатып тұрған кейуананы кез­дес­тірдік. Сол жерде қарияға жақ­сы­лық жасау мақсатында тауарын сатып алып, ол әрекетімізді таспаға түсірдік. Кейін роликті #Жақсылық жаса хэштегімен Facebook әлеуметтік желісіне жариялағанымызда, бұл бастамамыз қолданушылар арасында бірден қолдау тапты. Тіпті, аз уақыттың ішінде бүкіл Қазақстанды қамтып үлгерді. Сондықтан осы бастаманы белсенді жастардың игі істерді көптеп жасауына мұрындық болған шара деп айтуға толық негіз бар», – дейді М.Төлегенов. Сонымен қатар, жиынға қатыс­қан әнші, «Славян базары» ха­лықаралық ән байқауының жеңім­пазы Димаш Құдайберген сахнада жүрген барша өнер адамдарын жақсылық жасауға шақырды. «Ха­лыққа өнерімен танылған аға-әпкелерімді қайырымды істер жасауға шақырамын. Алдағы жұмыс жоспарларымызға қарттар мен балалар үйлеріндегі жан жылуына зәру жандарға сыйлықтар жасауды, қайырымдылық концерттерін ұйымдастыруды енгізсек деймін. Бұдан өнер адамдары еш ұтылмайды. Елдің біртұтастығы мен халықтың мейірімді болуы өзімізге байланыс­ты екенін есімізден шығармайық», – деген жас әнші кезінде өзіне қол­дау көрсетіп, жақсылық жасаған жан­дарға алғыс айтуды да ұмытқан жоқ. Одан бөлек, іс-шараға «Үй» қоғамдық қорының басшысы Ару­жан Саин, әнші Мөлдір Әуелбекова, Қазақстан халқы Ассамблеясының мүшесі Рүстем Әбдісаламов, Ана мен бала ұлттық орталығының дәрігер-неонатологы Гүлнәр Түкеева және «7 арнаның» атқарушы директоры Бақыт Әлпейісова қатысып, жо­баның пайдасы туралы өз ойларын айтты. Сондай-ақ, көлік ішінде толғақ қысқан әйелді босандырып алған полиция капитаны Бақыт Әлімқұлов та төрден орын алып, өзі жасаған игі іс туралы кеңінен баяндап берді. Тағы бір айта кетер жайт, шара бары­сында еліміздің бірқатар ай­мағымен тікелей байланыс орнаты­лып, Алматы, Атырау, Солтүс­тік және Батыс Қазақстан облысы­ның өкіл­дері өздері жасаған жақсы­лық­тары арқылы жобаға үлес қосқан­дарын мақтаныш ететіндерін жет­кізді. Ұйымдастырушылардың мә­лімдеуінше, акция әлі өз жалғасын табады. «Игі істер шежіресі онлайн режімде!» деген ұранмен өтіп жат­қан шараның басты мақсаты – жақ­сылықты, бейбітшілікті, мейірім­ділікті және өзара қолдау көрсетуді әдетке айналдырып қана қоймай, оны жанындағылармен бөлісу. Бүгінде осы шараға орай қазақ және орыс тілдерінде қызмет көрсететін dd.bnews.kz домендік атауымен арнайы жоба дайындалған. Онда әр қолданушы үшін мультимедиялық форматта (мәтін, сурет, ролик) өз жақсылықтарының тарихын жүк­теуге мүмкіндік бар. Сол үшін қолай­лы интерфакс ашылған. Сон­дай-ақ, өзге өңірлерде қанша игі іс жасалғаны жөнінде ақпарат алуға мүм­кіндік беретін геолокация қыз­меті де көрсетіледі. Еламан ҚОҢЫР, «Егемен Қазақстан».