Мәжіліс депутаттарына куәліктері тапсырылды
<p style="text-align: justify;"><strong>Кеше Орталық сайлау комиссиясының отырысы өтті. Күн тәртібінде VI шақырылатын Қазақстан Республикасы Парламенті Мәжілісінің депутаттарын тіркеу мәселесі қаралды.</strong></p>
Сонымен қатар, отырыста «Қазақстан Республикасындағы Сайлау туралы» Конституциялық заңның 12, 45, 46, 97-1 және 98-баптарына сәйкес, Орталық Сайлау комиссиясының қаулысы жарияланды. Қаулыны оқыған Комиссия төрағасы Қуандық Тұрғанқұлов: «Біріншіден, VI шақырылатын Қазақстан Республикасы Парламенті Мәжілісінің депутаттары тіркелсін. «Нұр Отан» партиясының партиялық тізімі бойынша – 84 депутат, Қазақстанның «Ақ жол» демократиялық партиясының партиялық тізімі бойынша – 7 депутат, Қазақстан Коммунистік халық партиясының партиялық тізімі бойынша – 7 депутат және Қазақстан халқы Ассамблеясы сайлаған 9 депутат. Екіншіден, тіркелген барлық депутаттарға Орталық сайлау комиссиясының отырысында куәліктер мен омырауға тағатын белгілер тапсырылсын. Үшіншіден, осы ақпарат бұқаралық ақпарат құралдарында жариялансын», – деді. Осыған орай, партиялық тізім бойынша тіркелген және Қазақстан халқы Ассамблеясы сайлаған барлығы 107 депутатқа куәліктері мен омырауға тағатын белгілері тапсырылды. Жиын соңында Қ.Тұрғанқұлов барлық депутатты құттықтап, жұмыстарына жеміс тіледі.
Еламан ҚОҢЫР,
«Егемен Қазақстан»