Додаға намыс түскенде...
<p style="text-align: left;">Өзбекстанның Бұқара қала­сында көкпардан халықаралық турнир өтті. Еліміздің құра­масы іріктеу кезеңінде қарсы­ластарын ірі есеппен еңсерді. Финал­дық тартыста қырғыз көкпаршыларын сүріндіріп, дүбірлі додада жеңіске жетті.</p>
Дүбірлі аламанның алғашқы бәсекелерінде көкпаршыларымыз Қытай командасын 11:0 есебімен жеңсе, Өзбекстанның бірінші құрамасын 11:2 нәтижесімен еңсерді. Финалда Қырғызстан құрамасын 3:0 есебімен ұтты. Жерлесіміз Ерғалым Жақсылық халықаралық турнирдің үздік ойыншысы әрі сұрмергені атанды. Жас оғлан дүбірлі додада өзінің әбжілдігімен дараланды.
«Жастарымыз жүктелген сенімге селкеу түсірмей, сын сәтінде жасындай жарқырады. Біз осы турнирде чемпион атануды мақсат етіп, тыңғылықты дайындалдық. Арғымақтарымыз да додаға жарап, қайрат танытты. Жігіттер қателікке бой алдырмай, қарсыластардың тактикалық жоспарын бұзып, өздерінің ойын өрнегін әйгіледі. Алда ең үлкен аламан – Дүниежүзілік көшпелілер ойындары. Қырғызстанда қоңыр күзде өтетін осы сайыста барымызды саламыз», деді ұлттық құраманың бас бапкері Нұрдәулет Момынов.