35 жылдан астам уақытқа созылған еңбектің нәтижесі: Головкин желіде маңызды жазба жариялады

<p>Аты аңызға айналған кәсіпқой боксшы, Ұлттық Олимпиада комитеті мен World Boxing президенті Геннадий Головкин Халықаралық бокс Даңқ залына қабылдануына қатысты пікір білдірді. Ол өз мәлімдемесін әлеуметтік желідегі парақшасында жариялады, деп хабарлайды <a href="/" target="_blank" rel="noopener noreferrer">Egemen.kz</a>.</p>

АҚШ-тың Канастота қаласында өткен салтанатты рәсімге GGG отбасы мүшелерімен бірге қатысқан болатын.

«Осы аптада менің атымның ресми түрде Даңқ залына енгізілгенін білесіздер. Бұл мен үшін үлкен мәртебе. Әлемдік бокстың ең ұлы өкілдерімен бір қатарда аталу – ерекше құрмет. Бұл жетістікке 35 жылдан астам уақыт бойы тынымсыз еңбек, тәртіп пен мақсатқа адалдықтың арқасында жеттім. Осы жолда мені қолдаған барша жанға шын жүректен алғыс айтамын. Спорт тарихына өлшеусіз үлес қосқан көрнекті тұлғалардың қатарынан орын алғанымды мақтан тұтамын», деп жазды Головкин.

Еске салайық, 15 маусымда Геннадий Головкин ел тарихында алғаш рет Халықаралық бокс Даңқ залына қабылданған спортшы атанды. Осылайша оның есімі Мұхаммед Әли, Майк Тайсон, Флойд Мейвезер мен Мэнни Пакьяо секілді бокстың әйгілі аңыздарымен бір қатарға жайғасты.

Спорт министрі: Геннадий Головкиннің World Boxing басшысы болуы – үлкен жетістік

Әуесқой бокста Головкин 350 жекпе-жектің 345-інде жеңіске жетіп, 2004 жылғы Олимпиадада күміс жүлде иеленген. Кәсіпқой рингте ол 42 жеңіс, 2 жеңіліс және 1 тең нәтиже көрсеткен.

GGG орта салмақта WBC, WBA, IBF және IBO тұжырымдары бойынша әлем чемпионы атанып, нокауттар саны бойынша Гиннестің рекордтар кітабына енген.