Көрме төрінде – Олжас әлемі
<p style="text-align: left;">Алматы қаласындағы «Almaty Museum of Arts» музейінде қазақ руханиятының көрнекті өкілі, ақын, қоғам қайраткері, дипломат әрі зерттеуші Олжас Сүлейменовтің 90 жылдық мерейтойына арналған мәдени кеш өтті.</p>
Тағылымды жиынға мәдениет пен өнер саласының өкілдері, қаламгерлер, архив ісінің мамандары мен ақын шығармашылығын қадір тұтатын зиялы қауым жиналды. Кездесуде Олжас Сүлейменовтің қазақ әдебиеті мен қоғамдық ойдың дамуына қосқан өлшеусіз үлесі, азаматтық ұстанымы, халықаралық деңгейдегі қызметі, бай шығармашылық мұрасының құндылығы кеңінен айтылды.
Іс-шараның маңызды бөлігі ақынның өмір жолы мен шығармашылық әлемін танытатын архивтік фотоқұжаттар көрмесі болды. Экспозицияға әр кезеңнің тынысын жеткізетін сирек фотосуреттер мен тарихи құжаттар қойылып, келушілерге Олжас Сүлейменов тұлғасының сан қырын тереңірек тануға мүмкіндік берілді. Бүгінде Орталық мемлекеттік кино-фотоқұжаттар және дыбыс жазбалары архивінің қорында қаламгердің өмірі мен қызметіне қатысты жүзге жуық құнды құжат сақтаулы.
Көрме мен мәдени кездесу ұлт руханиятында айрықша орны бар тұлғаның шығармашылық мұрасын дәріптеуге, оның әдеби және қоғамдық қызметінің маңызын кеңінен насихаттауға арналды. Шара ақын еңбектерінің уақыт өткен сайын өзектілігін жоғалтпай, қоғамның рухани дамуына қызмет етіп келе жатқанын тағы бір мәрте айқындады.
Мәдени кешті Орталық мемлекеттік кино-фотоқұжаттар және дыбыс жазбалары архиві «Almaty Museum of Arts «музейімен және ЮНЕСКО жанындағы Мәдениеттерді жақындастыру халықаралық орталығымен бірлесіп ұйымдастырды.