Тағылардың соқпағы
<p style="text-align: left;">Алтайдың ұшар басын адам аяғы сирек басады. Сол үшін де жалама шыңдарда жортқан жануарлардың тіршілігін бақылау оңай емес. Алайда, заманауи технологияның көмегімен табиғаттың тынысын үнсіз бақылап жүрген Катонқарағай ұлттық паркінің қызметкерлері бұл жолы да ауыз толтырып айтатындай фото олжаға кенелді.</p>
Өткен жылдың желтоқсанында Катонқарағай мемлекеттік ұлттық табиғи паркінің шалғай айналымдарына жабайы жануарларды бақылау үшін арнайы фото тұзақтар орнатылған-ды. Маусым айында жүргізілген кезекті тексеру кезінде мамандар күтпеген әрі қызықты деректерге көз жеткізді. Фотосуреттерге зер салсақ, бір ғана соқпақпен әр мезгілде әртүрлі жануарлардың жүргені анықталды. Фото тұзақ объективіне қоңыр аю, құну, тау ешкілері және қыс мезгілінде қасқырлар түскен. Бұл табиғаттағы тіршілік тізбегінің үзілмегенін, жануарлардың өз мекенінде еркін қозғалып жүргенін көрсетеді.
– Құрған фото тұзағымызды аңдардың бірі бүлдіріп тастапты. Әйтеуір жады картасы аман. Ауылға түсе сала картаны қарасақ, бір соқпақпен жүрген бірнеше аң түсіпті. Тағы бір құпия бар. Оны кейін айта жатармыз, – деді Жануарлар әлемін қорғау және өндіру бөлімінің меңгерушісі Ерік Қасымов.
Әсіресе, бір соқпақтың бойынан бірнеше аң түрінің тіркелуі табиғаттағы үйлесімділікті аңғартады. Бір қарағанда, иен жатқан тау шатқалдары мен орман белдеулерінде тіршілік қайнап жатыр. Қоңыр аюдың салмақты жүрісі, тау ешкілерінің жартасты беткейлердегі ширақ қимылы, қасқырлардың қысқы қозғалысы бәрі табиғаттың заңдылығымен өмір сүріп жатқанын дәлелдейді.
Табиғаттың шынайы көрінісі көбінесе адам көзінен тасада қалады. Ал фото тұзақтар сол құпия әлемнің бір сәтін кадрға түсіріп, жабайы табиғаттың үнсіз өмірінен сыр шертеді.
Шығыс Қазақстан облысы,
Катонқарағай ауданы