Ғажайып мекен

Айта кетейік, Шамбала – ежелгі наным-сенімде аты аңызға айналған қасиетті мекен. Ондағы жұрт көбіне рухани кемелдікке жеткен, даналық пен бейбітшілік салтанат құрған құпия ел деп сипатталады. Алтай аңыздарында мұндай мекенді ақ жұмақ деп те атаған көрінеді. Ал біздің кейіпкеріміз суреттеген ғажап мекен тіпті де қиял әлемінде емес. Әмбеге аян Дұбығалы көлінің жағасы. Айна көлді алқалаған ғажайып жартастардың бірі батырдың тұлғасына, бірі мамонттың бас сүйегіне, енді бірі қолтырауын бейнесіне ұқсайды.

– Неге екенін қайдам, айна­ламыздағы ғажайыптарды байқай бермейміз. Бүгінгі көрмеден көп­шілік сонау Дұбығалы көлі­нің маңа­йындағы ерекше жартастарды көріп, таңғалысып жатыр. Көрме әлі жал­ғасады, есігіміз ашық, – дейді музей қызметкері Оразай Жеңісұлы.

Ал «Алтайдағы Шамбала» экспозициясымен таныс болғандар Дұбығалы жағасына барса, мүлде басқа әлемге, суретші сипаттаған ақ жұмаққа тап бол­ғандай болады. Қожыр-қожыр тастарға қарап, табиғаттың шексіз сұлулығына қайран қаласыз.

Суретші бұл мекенді ежелгі өрке­ниет­тің ошағы деп есептейді. Ғажап жар­тастар табиғаттың ғана емес, адам қолы­ның туындысы деп санайды. Кемеліне жет­кен ежелгі өркениеттің жұрнағын бү­гінгі ұрпақ танып, білсе деген тілегі бар. Бірегей көрме арқалаған бір жүк осы.

Көрмеде автордың 30 кескін­деме ­туындысы ұсынылған. Шығар­­малардың не­гізгі арқауы Дұбы­ғалы көлінің маңындағы ерекше жартас түзілімдері еке­нін айттық. Табиғат бедерінен өзгеше бейнелерді көре білген суретші оларды шығармашылық қиялымен ұштастырып, мифо­ло­гиялық образдар арқылы көркем шешім тапқан.

Экспозицияда шынайы таби­ғат көріністері мен қиял әлемі астасып, көрерменді туған өлкенің тылсым сырын тануға жетелейді. Әрбір туынды табиғаттың сұлу­лығын ғана емес, адам мен қорша­ған орта арасындағы рухани байланысты да бейнелейді.

Көрменің ашылу рәсіміне зиялы қауым өкілдері, суретшілер, өнер­сүйер қауым және қала тұрғын­дары қатысты. Қонақтар автордың шығармашылығына жоғары баға беріп, көрме туралы жылы лебіз­дерін білдірді.

«Алтайдағы Шамбала» көрмесі ­­1­­­ тамызға дейін ашық болады. Өнер­сүйер қауым үшін бұл көрме Алтайдың табиғи мұрасын жаңа қырынан танып, кес­кіндеме өнерінің көркем әлеміне бойлауға мүмкіндік береді.

ӨСКЕМЕН