Халықтың тұрмысы жақсарады
Жолдауда айтылған экономикалық мәселелер мен халықтың тұрмысын жақсарту мәселелеріне Regnum.ru агенттігі де назар аударды.
Ақпарат агенттігі Н.Назарбаевтың халыққа Жолдауында шикізаттық емес экономикаға тартылатын тікелей инвестицияға арналған арнайы қор құруды тапсырғанын жазады. Мұндай қадам ауқымды жобаларды жүзеге асыруға мүмкіндік бермек.
Осы бастаманы жүзеге асыру үшін 300 миллиард теңге қарастырылған. Агенттік осының арқасында шетелдік инвесторлардың Қазақстанға қызығушылығы арта түседі деп пайымдайды.
«Қазақстан Президенті басымдығы бар жобаларға қолжетімді несие беру міндетін шешу үшін Ұлттық банкке кемінде 600 миллиард теңге көлемінде ұзақ мерзімге қаржы бөлуді тапсырды. Сондай-ақ осы қаражаттың көзделген мақсатқа жұмсалуын қатаң бақылауды қамтамасыз етуі керектігін атап өтті», дейді Regnum.ru.
Бұдан кейін ақпарат агенттігі Елбасының отандық тауарларды тұтынуға және қолдауға шақырып, қазақстандық тауар өндірісін жандандыру қажеттігін айтқанын жазады.
Сондай-ақ 2030 жылға дейін аумақтық дамыту жөніндегі жоспар жасалатынына да тоқталып өтті. Құжатқа сәйкес, ауылдар мен елді мекендердің болашағы зерттеледі. «Н.Назарбаев жоспар елдегі урбанизацияны басқаруға мүмкіндік беретінін атап өтті. «Инфрақұрылым адамдарға» моделінен «адамдар инфрақұрылымға» моделіне бірте-бірте көшу қажеттігін мәлімдеді», дейді Regnum.ru.
Экономикаға маңыз берілді
Trend ақпарат агенттігі Қазақстан Президенті Нұрсұлтан Назарбаевтың халыққа Жолдауына ерекше назар аударды. Әсіресе Президенттің ел экономикасын одан әрі дамыту туралы ойларына жекелей тоқталды.
Әзербайжандық ақпарат агенттігі «Бизнестің жол картасы-2020» бағдарламасын 2025 жылға дейін ұзарту қарастырылғанын атап өтті.
«2010 жылы «Бизнестің жол картасы-2020» бағдарламасын іске қостық. Өңірлерге барған сапарымда бұл тиімді бағдарлама екеніне көз жеткіздік. Бағдарламаны 2025 жылға дейін ұзартуымыз керек. Оны жүзеге асыру үшін жыл сайын кемінде 30 млрд теңге бөлуіміз қажет», деген болатын Елбасы.
Trend Жолдауда айтылған тағы бірқатар мәселелерге назар аударды. Мәселен, Мемлекет басшысы ауыл шаруашылығы өнімінің экспортын 2022 жылға қарай 2,5 процентке көбейту міндетін қойды. Осыған сәйкес, алдағы уақытта жыл сайын ауыл шаруашылығына 100 миллиард теңге қарастырылады.
Ақпарат агенттігі өнеркәсіп саласын ілгерілендіру үшін алдағы үш жылда қосымша 500 миллиард теңге бөлінетінін де атап өткен. Trend-тың пайымдауынша, бұл ел экономикасын нығайта түсіп, өнеркәсіп саласын дамытуға зор үлес қосады.
Әлеуметтік сала басты назарда
Елбасы Жолдауына бауырлас Түркияның бұқаралық ақпарат құралдары да назар аударған екен. Haberler басылымы Жолдауда халықтың тұрмыс-тіршілігіне қатысты әлеуметтік маңызды мәселелер айтылғанын жеткізеді.
«Жолдауда айтылған бағыттарға қарағанда, Қазақстанның жаңғыруында әлеуметтік мәселелерге басымдық берілгені аңғарылады. Н.Назарбаевтың адам капиталына ерекше мән беруі өңірдегі даму моделінің жаңа бір белеске көтерілгенін көрсетеді», дейді Haberler.
Басылымның пайымдауынша, Жолдауда айтылған мәселелер адам капиталын дамытуға ерекше үлес қоспақ. Яғни, осы қадам арқылы Қазақстанда әлеуметтік мемлекет құру идеясы жүзеге асырылады.
«Мемлекеттің басты міндеті – халқына қызмет ету. Осы орайда, Н.Назарбаевтың мақсаты Қазақстан халқын бәсекеге қабілетті ұлтқа айналдыру. Оны жүзеге асыру адамдардың денсаулығына, білімге, мәдениетке және кәсіпкерлікке тікелей байланысты», дейді Haberler.
Шолуды дайындаған
Абай АСАНКЕЛДІҰЛЫ,
«Егемен Қазақстан»