Оған Ұлттық экономика министрінің бірінші орынбасары Руслан Дәленов, Білім және ғылым вице-министрі Асхат Аймағамбетов, Қаржы министрлігінің Ішкі аудит комитетінің төрағасы Азамат Ахметов, Сыртқы істер министрлігі Халықаралық ақпарат комитетінің төрағасы Талғат Жұмағұлов, Стратегиялық зерттеулер институты директорының орынбасары Санат Көшкімбаев, «Жайна, Астана» қоғамдық бірлестігінің төрағасы Мұхтар Еркетаев және т.б. қатысты. Олар – Жолдауды түсіндіру жөніндегі республикалық ақпараттық топтың мүшелері.
Алдымен Ермек Аманшаев сөз сөйлеп, Жолдаудың Астана қаласына қандай өзгерістер мен жаңалықтар әкелетінін жеткізді. «Алдымен айтарым, бюджеттен ақша алатын 10 мыңнан астам азаматтық қызметкердің жалақысы 30-35 пайызға дейін өсетін болады. Бұған қажетті қаражат бюджеттен тиісінше көзделіп отыр. Ең төменгі еңбекақының өсетініне байланысты 80 мыңнан астам жалдамалы жұмысшының еңбекақысы да өседі. 2018-2022 жылдарға қала өндірісіне құйылатын инвестициялардың есебінен жаңа 55 мың тұрақты және 100 мың уақытша жұмыс орындары ашылатын болады. Елбасының тапсырмасына сәйкес, біз еңбек нарығы жүйесін барынша жетілдіріп, барлық жаһандық қауіп-қатерлерге қарсы тұра алатын жағдайға жеткізуді көздеп отырмыз. Бұл қатарда жоғары технологияларға қол жеткізу мен цифрландыру жүйелері қатар жүргізілетін болады, дей келіп, ол одан әрі білім беру саласындағы өзгерістерге тоқталды. «Алдымыздағы бес жылда біз 37 жаңа мектеп құрылысы мен 10 қосалқы құрылыстарды аяқтайтын боламыз. Соның ішінде 4 нысан биылғы жылдың аяғына дейін пайдалануға беріледі. Ал 2019 жылдың аяғына дейін тағы да 14 нысанды пайдалануға беру көзделген. Сонымен қатар бұл мектептер қазіргі 1200 оқушыға арналған стандарттарда емес, 2500-3000 балаға арналған, кеңейтілген стандарттармен салынатын болады. Сөйтіп біз Астананың 20 жылдық тарихында қамтыған оқушыларының санына соңғы 5 жылда ғана жеткелі отырмыз. Осындай шаралардың арқасында біз үш ауысымды мектептер санын да барынша азайтатын боламыз. Астанада бірінші рет білім беруді жаңаландыру орталығының базасы шеңберінде мемлекеттік және жекеменшік балабақша тәрбиешілерінің біліктілігін арттыру, методикалық көмек көрсету жұмыстарын бастадық. Бұл жұмыстарға Астана бюджетінен 350 млн теңгеден артық қаражат бөлінді. Қазірдің өзінде 1500-ден астам тәрбиеші осындай, біліктілігін арттыру курстарынан өткізілді. Сонымен қатар қаланың білім беру жүйесіне дайындығы барынша күшті, біліктілігі жоғары мұғалім кадрларды тартуға жағдай туғызу жұмыстары да қатар жүргізілуде. Осыған байланысты, кадрларды сапалы дайындау мақсатымен биыл ғана аса қажетті мамандықтар дайындау үшін 13 ЖОО-ға 1 мыңнан артық грант бөлдік. Сөйтіп білікті педагогтар дайындау біздің жұмысымыздың басымды бағыты болып танылды», деді ол.
Е.Аманшаев сондай-ақ Жолдаудағы аса маңызды басымдықтардың бірі – денсаулық сақтау және дені сау ұлт қалыптастыру мақсаттарын орындау үшін Елбасы өзінің сөзінде денсаулық сақтау ісінің алдыңғы қатарындағы қызмет – емханалар мен амбулаториялар сапасының жақсы болуын атап көрсеткен еді. Осы мақсатқа қол жеткізу үшін медицина қызметкерлерінің еңбекақысы 20 пайызға кезең-кезеңмен өсірілетіні айтылған. Астанада бұл 588 учаскелік дәрігерді және 1 мыңға жуық медбикелерді қамтиды. Ал жаңа әдіспен жұмыс істеу тәсілін үйрету 2019 жылдың соңына қарай толығымен аяқталады. Бұл медициналық көмек көрсету сапасын арттырады деген үміттеміз. Биылғы жылдың аяғына дейін медицинада толықтай қағазсыз жұмыс істеу әдісіне көшеміз. Бүгінгі таңның өзінде тұрғындардың 93 пайызы денсаулықтың электронды паспорттарымен қамтылды. 2019 жылдың 1 қаңтарынан бастап Астананың барлық емханалары мен ауруханалары медициналық құжаттарды қағазсыз жүргізетін әдіске толықтай көшіріледі», дей келіп, одан әрі Е.Аманшаев алдымыздағы жылы тағы да 5 емхана салынатынын атап өтті. Бұл емханалар кезекті азайтады және бір дәрігерге қаралатындардың санын 1700-1800 адамға дейін қысқартады. Ал бүгінгі таңда бұл сан 2200 адам болып отыр. Сонымен қатар осы жылдың аяғына дейін тағы да 48 учаске ашу жоспарланған», деді ол.
Сонымен қатар Е.Аманшаев Астанада кәсіпкерлікті ынталандыруға бағытталған бизнес ахуалды арттыру шараларына да тоқталып өтті. Жыл басынан бері алғанда қаладағы ШОБ субъектілерінің саны 8,9 пайызға артты. Жалпы ШОБ өндірісінен бюджетке түскен салық көлемі 297,2 млрд теңгеге жетті, деді ол. Бұл барлық салық көлемінің 45 пайызы екен.
Одан әрі халықты тұрғын үймен қамту мәселесіне тоқталған әкімнің орынбасары бұл жұмыстың Астанада қалай жүргізіліп жатқанын қысқаша айтып өтті. «7-20-25» бағдарламасына сәйкес үй алу үшін мұғалімдерге, бюджеттен еңбекақы алатын басқа да қызметкерлерге, соның ішінде құқық қорғау органдарының қызметкерлеріне 1000 000 теңгенің сертификаты берілді. Бұл жұмыс келесі жылы жалғасын табады», деді Е.Аманшаев.
Осыдан кейін сөз басқа спикерлерге беріліп, талқылау қорытындысы бойынша Жолдаудың барлық позицияларынан қарапайым адам нақты пайда табады деген ұстаным алға шықты.
Жақсыбай САМРАТ,
«Егемен Қазақстан»
