Бұл бағытта өңірдегі М.Өтемісов атындағы Батыс Қазақстан мемлекеттік университеті мен Жәңгір хан атындағы Аграрлық-техникалық университетінде студенттерді жатақханамен қамту ісі біршама шешімін тапқанымен, облыс орталығындағы колледждерде аталған мәселе әлі де өткір. Сондықтан қазіргі күні мұндағы мүдделі ұйымдар ең бірінші кезекте осы қатарға кіретін болашақ мамандар үшін жатақханалар жобасын жүзеге асыруға басымдық беруде.
Жаңа жатақханалар құрылысы үшін ең қажетті фактордың бірі қаржыландыру екені анық. Оның бәрін бюджет қаражаты есебінен өтеу тиімді бола бермейтіні бесенеден белгілі. Бұл үшін жоғарыда айтылғандай, жеке инвесторлар қаражатын тарту басты басымдыққа ие екенін тағы бір мәрте айта кеткеннің артықтығы жоқ. Бұған қоса жатақханамен қамту ісінде Жайық жағасында өзге де ұтымды тәсілдер мен жолдар жүзеге аса бастаған. Айталық, Батыс Қазақстан облыстық білім басқармасының басшысы Айкүл Мыңбаеваның айтуынша, Батыс Қазақстан индустриялық колледжі студенттері үшін «Орал трансформатор зауыты» ЖШС салып жатқан 300 орындық жатақханадан орын берілген. Тұтастай алғанда, қазіргі кезде Орал өңірінде жеке инвесторлар есебінен жалпы саны 1 200 орынға арналған төрт жатақхана құрылысы жүргізілуде. Бұдан бөлек, биылғы 2020 жылдың қыркүйек айында Батыс Қазақстан жоғары медициналық колледжінің оқушы-студенттері үшін 144 орындық жатақхана пайдалануға берілген. Оны «Хайрекешева» жеке кәсіпорны тұрғызған. Аталған колледжде бұған қоса тағы 300 орындық жатақхана салу жобасы қарастырылуда.
Сондай-ақ Орал политехника колледжі студенттеріне 150 орындық жатақхананы «Болашақ» ЖШС тұрғызуда. Аталған құрылысты алдағы 2021 жылдың қыркүйек айына дейін аяқтау белгіленген. Сонымен бірге медицина колледжі үшін алдағы жылдың басында 50 орындық жатақхана құрылысын көтеру жоспарланған. Айта берсе мұндай мысалдар жеткілікті.
Ендігі кезекте бүгінгі көтеріліп отырған тақырыпқа орай тағы бір жайтты оқырмандар назарына сала кеткеннің артықшылығы жоқ секілді. Айталық, сонау кеңестік кезеңде студенттер жатақханада жыл бойы тегін тұрып келгені мәлім. Бұл үшін біржолғы жылдық төлемнің көлемі кеңестік бес-он сомнан аспағанын білеміз. Қазіргі кезде де студенттер үшін жатақханада тегін тұру тәртібі сақталып қала бере ме? Жоқ, олай емес, бүгінгі нарықтық қарым-қатынастар бұған өз түзетуін енгізе бастағаны байқалады. Осы тұрғыда Орал қаласының әкімі Абат Шыныбековтің айтуынша, жаңа жатақханалар пайдалануға беріліп, студенттер мұнда тұра бастағаннан кейін олар айына 10-12 мың теңге төңірегінде ақы төлеуі мүмкін. Бұл коммуналдық төлемдердің шығыны болып шығады. Салыстырмалы түрде алғанда, бұл баға жатақхана тұрғындары үшін өте тиімді деп есептейміз. Айталық, облыс орталығында пәтер жалдап тұратын студенттер оның иелеріне айына кем дегенде 50 мың теңгеден кем төлемейді. Қараңыз, айырмашылық деңгейі өте жоғары. Әрине, ақылы жатақханада тұру – студенттің өз еркіндегі мәселе. Бұған ешкім араласпайды.
Біздің ойымызша, қала басшысы сөзінің қисыны бар секілді. Төмен мөлшерде болса да студенттер ақы төлеген соң жатақхана да бүгінгі заманауи талаптарға сәйкес барлық жағынан жайлы да сайлы болуы керектігі ешқандай талас туғызбайды. Бұған қоса жатақхана жанынан спорт алаңы мен асхана жасақталса, тіптен құба-құп. Материалымызды түйіндей келе, жеке кәсіпкерлер мен инвесторлар тұрғызған жатақхана құрылысына жұмсалған қаражаттың басым бөлігі бюджет қаражаты есебінен өтелетінін айта кеткенді жөн көреміз. Сайып келгенде, бұл екі жаққа да тиімді екені анық. Әрі мұның өзі мемлекет-жекеменшік әріптестігінің жарқын мысалдарының бірі болып қала бермек.
ОРАЛ
