Барша адамзатты жаратқан тәңірдің қазақ халқына ерекше сыйы бар екен. Ел несібесі тәуелсіздігімізбен еселене түсті. Әрине, егемендіктің елең-алаңындағы қиындықты еңсеру оңай бола қойған жоқ. Өйткені өз дербестігіне қол жеткізген талай ел осындай жолдан өткенін кәрі тарихтың шежірелі бетінен білеміз. Сол кезеңде зауыт-фабрикалар бірінен кейін бірі жұмысын тоқтатып, кәсіпорындардың дені жұмысшыларына жалақыны тауып бере алмады. Бейнетке толы еңбегінің зейнетін көріп отырған зейнеткерлердің зейнетақысы мен көпбалалы аналардың жәрдемақысы да айлап қолға тимеді. Қазақстан Республикасының Тұңғыш Президенті – Елбасы Нұрсұлтан Назарбаев ел сенімін ақтау үшін тәуелсіздіктің алғашқы күнінен экономикалық һәм саяси реформаларды іске асыруды қолға алды. Тәуелсіз еліміздің мемлекеттік рәміздері – Елтаңбасы мен Әнұраны, көк байрағы мен Ата Заңы қабылданды. Отандық экономиканы еңселендіру үшін шетелдің алпауыт компанияларын шақырып, инвестиция салуға иландырды. Тіпті кейбірін қолынан жетелегендей етіп, елге әкелді.
Экономикасы мен демократиясы қанат жайып, әлемдік өркениеттің биігіне өрлеген елдермен, ежелден көршілік хақы бұзылмаған мемлекеттермен іскерлік, әріптестік, ынтымақтастық байланыс орнатты. Шарболаттай шыңдалған шекарашыларымыз кірпік ілмей, күні-түні күзететін шекарамыз шегенделді. Сан алуан өнімді өз елімізде өндірудің қамымен зауыт-фабрикалар мен кәсіпорындар, онда сан мыңдаған жұмыс орны ашылды. Алыс аудандардағы ауыл адамдарының әлеуметтік тұрмысын жақсарту үшін мектептер мен балабақшалар, ауруханалар, өзге нысандар бой көтерді. Шаһар мен шаһарларды, ауыл мен ауылдарды жалғаған тақтайдай тегіс жолдар салынды. Мемлекет тарапынан шағын және орта бизнесті кәсіп етіп, табыс табуға ынта танытқандарға қолдау көрсетілді. Қалаларда көпқабатты тұрғын үйлер бой көтеріп, табиғи газбен, электрмен, сумен жабдықтау үшін жаңа желілер тартылды. «Теңіз», «Қашаған» секілді әлемде теңдесі жоқ кен орындары игерілді. Қара теңіз жағалауындағы айлаққа тікелей құбырмен мұнай тасымалдау басталды. Отандық экономиканың бар саласына, әсіресе ауыл шаруашылығына жан бітіп, тамырына қан жүгірді. Қазір өрісте отар-отар қой өріп, үйір-үйір жылқы жайылады.
Сарыарқаның төрінде еңселі елорда қанат жайды. Шығыс пен Батыстың ең көркем архитектуралары өзара үйлесім тапқан, өзіміз қызығып, жаһан жұрты тамсанып, тіпті қызғанып қарайтын Нұр-Сұлтандай жаңа дәуір шаһары елдің де, қазақтың да абыройын асырып, мерейін тасытты. Елорданың төрінде талай жұрттың басы қосылған саммиттер мен форумдар, ЭКСПО-ның көрмесі өтті. Дәл осы қаланың әуежайынан әлемнің төрт бұрышына, еліміздің әр өңіріне заманауи ұшақтар ұшады. Сол ұшақтармен еліміздің мыңдаған өрені «Болашақ» бағдарламасымен шетелдің танымал университеттерінде ілім-білімін жетілдіру үшін жолға шықты.
Мұның бәрі тәуелсіздікті тұғырлы етіп, бодандықтың қамытынан босаған тәуелсіз елдің еңсесін тіктеудің қамы болатын. Тыңнан түрен салғандай, саяси, әлеуметтік-экономикалық ахуалды жақсартумен бірге, ел тарихы мен әдебиетіне, мәдениеті мен өнеріне, ұлт келешегінің ертеңін ойлап, жанқиярлық іс-әрекетке барғаны үшін сотталып, атылып кеткен Алаш арыстарына қатысты деректердің ақтаңдақ беттері ашылды. Ғылымның «инемен құдық қазғандай» қиын жолына бет бұрған ғалымдарға қолдау көрсетіліп, ұлт тарихын қайта жаңғырту үшін архивтерде шаң басқан деректерге іргелі зерттеулер жүргізілді.
«Egemen Qazaqstan» газетінде жарияланған Тұңғыш Президент – Елбасы Нұрсұлтан Назарбаевтың «Тәуелсіздік тағылымы» атты мақаласын оқып отырғанда, отыз жылда тәуелсіз Қазақстанымыздың қаз тұрып, қалыптасу, шыңдалып, шыңға өрлеу кезеңі ойға оралды. Тәуелсіздікті тұғырлы етіп, Қазақстандай еңселі елді, қазақтай қайсар ұлтты әлемге танытудың бастауында сенім білдірген елін асыл мұратпен алға жетелеген Тұңғыш Президент – Елбасы тұрғаны, барша қазақстандықтың баянды болашағы үшін ерен еңбек сіңіргені даусыз. Ендігі тілегіміз – баһадүр бабаларымыз бен Алаш арыстарының түн ұйқысын төрт бөліп, аңсары мен арманына айналған тәуелсіздігімізді баянды ету.
Илья ЖАҚАНОВ,
Қазақстан мен Қырғызстанның еңбек сіңірген қайраткері, «Парасат», «Отан» ордендерінің иегері
Атырау облысы
