Таяуда ғана тағайындалған Құмар Ақсақалов өңір басшысы ретінде өзі шақырған алғашқы кеңестің жылу мәселесіне арналуы жайдан-жай еместігін атап өтіп, бұл саланың көптен бері тасада қалып қойғанын айтты. Мұның салдары енді ғана білініп жатыр. Мәселен, қыс кәріне мінбей жатып Боровской кентіндегі жылу орталығындағы негізгі қазандықтардың бірі істен шықты. Сондай-ақ Сарыкөл, Федоров аудандарындағы мектептер жылусыз қалды. 23 қарашада Арқалық қаласының жылу-энергетикалық орталығындағы №5 жылу қазандығы істен шықты, 30 қарашада Рудный қаласында магистралды су құбыры жарылды. Апаттың бәрі дер кезінде қалпына келтірілді. Алайда бұл жағдайлар өңірдің жалпы жылу жүйесін, қазандықтар мен жылу жолдарының жай-күйін жете зерделеп, кешенді жөндеу, жаңарту жұмыстарын қолға алатын уақыттың жеткеніне көз жеткізіп отыр.
– Рудныйда жылу желілерінің 62%-ы әбден тозған. Қалаға жылу беретін жылу-энергетикалық орталық Соколов-Сарыбай тау-кен байыту комбинатының меншігінде. Мұндағы №3 жылу қазандығына әлі күнге дейін жөндеу жүріп жатыр. №5 жылу қазандығындағы жөндеу жұмыстары жыл соңында ғана аяқталады. Арқалықтың жылу құбырларының 85%-ы ескірген. Жер астындағы құбырларды ішінара жамап-жасқағанмен, жүйелі жұмыс жүргізілмеген. Арқалықтың жылу орталығын мазуттан көмірге ауыстыруды аяқтау маңызды. Бүгінде мұндағы жылу орталығында 2 қазандық көмірмен, 1 қазандық мазутпен жанады. Отпен ойнауға болмайды, бұл мәселе тікелей бақылауымда болады, – деді облыс әкімі Қ.Ақсақалов.
Жиынға қатысушыларды жылу маусымының барысы жайынан хабардар еткен облыстық энергетика және тұрғын үй құрылысы басқармасының басшысы Дәурен Асқаровтың айтуынша, биыл өңірде жылу жылдағыдай жоспарға сәйкес беріліп жатыр. Барлық нысандар жылу жүйелеріне қосылған. Жазда 48 шақырым жылу жүйесі жөнделіп, 15 шақырым су құбыры мен кәріз жүйесі жаңартылған. Қыстан қысылмай шығу үшін облысқа 465,4 мың тонна көмір қажет. Қолда 416 мың тонна көмір бар. Әлеуметтік нысандардың бәрі дерлік қатты отынмен қамтамасыз етілген.
Облыстық білім басқармасының басшысы Зәуре Бәйменованың айтуынша, Федоров ауданындағы орта мектептің жылусыз қалуы қазандықтың көмірден газға ауысуынан туындаған. Бұған дейін көмірмен жылытылып келген білім нысаны биыл газға көшкен. Бірақ мердігер компания құрылыс жұмыстарын кешіктіріп тапсырғандықтан, үлкен ғимаратты жылытуға осыдан 4-5 күн бұрын қосылған газ пешінің қуаты жетпей қалған.
– Бүгінгі таңда Ы.Алтынсарин мектебіндегі 16 оқу кабинетінің тек екеуінде – математика және физика кабинеттерінде ғана сынап бағанасы 17 градусты көрсетіп тұр. Қалған сыныптарда қалыпты температура 18 градустан жоғары. Сонымен қатар, Сарыкөл кентіндегі Урицкий жалпы білім беретін мектебінің жылыту жүйесінен де ақау шыққан. Бұл нысан 2017 жылдан бері Қостанай жылу тасымалдау компаниясына сенімгерлік басқаруға берілген. Тексере келгенде от жағушы өз міндетін дұрыс атқармаған. Білім ошағындағы 20 оқу кабинетінің екеуінде температура 15 градустан жоғары көтерілмейді. Осыған байланысты 5-желтоқсаннан бастап 290 адам оқитын мектеп екі ауысымдық оқуға көшті, – деді З.Бәйменова.
Облыс басшысы өңірде биоотынмен жанатын жылу қазандықтарын тәжірибеге енгізу қажеттігін айтты.
– Бұл жерде көмірмен емес, сабанмен жанатын жылу қазандықтары туралы айтып отырмын. Бүгінде мұндай тәжірибені біраз өңірлер қолданып жатыр және ол тиімді әрі көмірге қарағанда екі есе арзан отын екенін көрсетіп отыр. Түптеп келгенде, мұндай арзан отын қыруар бюджет қаржысын үнемдеуге мүмкіндік береді. Біз алдағы уақытта, әсіресе, әлеуметтік нысандарды биомассамен жылытуға көшуіміз керек. Мұндай қазандықтарды жасап шығаратын компаниялар Қостанайда да бар. Сөйте тұра, қолда бар мүмкіндікті пайдалана алмай отырмыз. Жылу қазандықтарын биотынға көшіру кезек күттірмейтін міндет, – деді облыс басшысы.
Жиын соңында Қ.Ақсақалов аудан және қала әкімдері мен облыстық басқарма басшыларына өздеріне тиесілі аумақтағы жылу желілерінің жұқарған тұстарын, ескірген жылу қазандықтарын анықтап, келесі жылғы бюджет есебінен қаржы қарастыру үшін тез арада нақты ұсыныс әзірлеуді тапсырды.
Қостанай облысы
