Ұлы дала патшайымдарын кілем бетіне суреттеген гиперреалист суретші Әсел Сабыржанқызы шығармашылықта түрлі техниканы қолданып, тәжірибе жасағанға құмар. Оның бұған дейінгі туындылары да қоғамның ыстық ықыласына бөленген еді. Атап айтсақ, Бауыржан Момышұлы, Батырхан Шүкенов, Геннадий Головкин сынды ел мақтаныштарының портреттері сәтті шыққан.
Әсел кейінгі уақытта гиперреализм жанрында шеберлігін шыңдап келеді. Гиперреализм – нысанды фотореализацияға негізделген сурет салу мен мүсіндеудің стилі. Суретшінің осы бағытта алты қарындашпен бір уақытта алты адамның портретін салуы көрерменін кезекті рет елең еткізді.
«Он жылдан аса кескіндеме бойынша білім алдым. Маған гиперреализм бағыты бойынша сурет салу қатты ұнайды. Дәл осы бағытты елімізде алғашқылардың бірі болып дамытқым келді, өйткені тікелей осы жанрда сурет салатын маман тапшы. Сондықтан да бұл жолда өте ұзақ іздендім. Гиперреализм бағытында көптеген сурет сала бастадым. Содан кейін тапсырыстар да түсетін болды. 2021 жылдан бастап әлеуметтік желіде белсенді түрде блог жүргіздім. Әртүрлі техникамен сурет салғанымды видеоға түсіріп, жариялап отырдым. Өз блогімде машинаның капотына да, қолыммен, аяқтарыммен де сурет салдым, сонымен қатар 3 және 6 портретті бір уақытта салып, түрлі тәжірибе жасадым. Осылайша, аудиториям күннен-күнге көбейіп, өнерге қызығатын адамдардың саны артты», дейді Әсел Сабыржанқызы.
Аталған көрме негізінен дала әйелінің батыл бейнесін көрсету мақсатында ұйымдастырылған. Әсіресе қоғамға беймәлім әйелдердің бейнелеріне айрықша мән берілген.
«Томиристі, Әлия Молдағұлованы бәрі біледі. Бірақ бізде ұмытылған батыр қыздарымыз қаншама? Мысалы, Гауһар батырды, Айбике батырды, Сүйінбике мен Бопайды көп адам білмейді. Мен жастарға қазақтың ұмыт болған батыр қыздарын, тарихымыздағы мықты әйел образдарын көрсеткім келді», дейді суретші.
Қаз-қатар тізілген қазақ қыздарының бейнесі бір сәтте-ақ рухыңды оятып, ата-бабадан қалған іштегі бір батылдығыңды тірілтеді. Тіпті туындылардың шынайы шыққаны соншалық, көздеріндегі қайрат пен жігер өңменіңнен өтеді. Портреттердің бәріне ортақ күш – ұлттық рух. Ұлан-ғайыр дарқан даланың бар кеңдігін жиған образдар ұлттың ұраны секілді жан тербетеді. Мұндай рухты оятатын туындылардың ел ішіне таралып, жас ұрпақты тәрбиелеп жатқаны да үлкен олжа емес пе? Суретшінің діттеген мақсаты да осы.
Жемісті жұмыстың арғы жағында әрқашан тынымсыз еңбек пен үздіксіз ізденіс жататыны айқын. Суретшінің тың стилі, өзіндік қолтаңбасы да соның дәлелі. Ол бұған дейін көптеген республикалық және халықаралық байқауларда жүлделі болып, шыңдалып келеді. 2012 жылы «Ernst & Young» компаниясы өткізген конкурсқа қатысып, екі картинасы жүлделі бірінші және екінші орын алғаны есімізде. Бүгінде аталған картиналар компанияның кеңсесінде ілулі тұр.
Иә, Әселдің бүгінде атағы Арқадан Атырауға дейін жайылған. Әлеуметтік желіні де осы мақсатта тиімді пайдаланып отыр. Қазір жас суретшінің TikTok-та – 320 мың, Instagram-да 113 мың адамдық аудиториясы бар. Бұл – үлкен нәтиже. Өз туындыларын заманның ағымына сай көрерменге ұсынып, қошеметіне ие болу да өнер емес пе!
