«Айқай» – режиссер Кенжебек Шайқақовтың екінші толықметражды жұмысы, ал Ұлттық киноны қолдау мемлекеттік орталығының қолдауымен түсірген алғашқы фильмі. Кейіпкерлерін нәзік юмормен сараптайтын режиссердің суреткерлік қолтаңбасы айқын. Өткен жылы Оңтүстік Кореяда өткен әйгілі Пусан кинофестивалінің А Window on Asian Cinema бағдарламасы аясында көрсетілген фильм енді кәрі құрлық көрермендерін тәнті етті.
– Халықаралық кинофестивальдерде фильмдерімізге деген сұраныс жоғары екенін көріп отырмыз. Әлемдегі ең ірі кинофестивальдерде топ жарып жүрген «Айқай» картинасы – осының дәлелі. Жалпы, киноиндустрия өкілдері және біздің орталық жұмысты бір жүйеге қойып, әр фильм өз мақсатын айқындауға тиіс. Бізге фильмдеріміздің сөрелерде шаң басып жатқаны емес, олардың прокатқа шығуы, фестивальдарға қатысып, жетістіктерге жеткені маңызды, – деп атап өтті «Ұлттық киноны қолдау мемлекеттік орталығы» КеАҚ басқарма төрағасы Құрманбек Жұмағали.
«Айқайда» ядролық сынақтардан зардап шеккен Семей полигоны құрбандарының тағдыры баяндалады. Екі аяқсыз туған бас кейіпкердің өмірі арқылы ядролық жарылыс құрбандарының қасіретті тағдыры, сонымен қатар анасынан айырылған баланың әкесіне жанашырлығын, қамқорлық жасауға деген талпынысы боямасыз суреттеледі.
Көркем туындының түсірілімі Абай облысының Аягөз ауданы, Шыңғожа ауылында өтті. Басты рөлдерде ойнаған Орынбек Шаймағанбетов, Арнұр Акрам, Ерболат Әлқожа, Бейнұр Баймұхамбетов, Ерлан Малаев, Айбек Иманқұлов, Айғаным Нұрсұлтан сынды актерлер жұмысы шынайылығы һәм бейне сараптаудағы тереңдігімен дараланды.
