Фото: Ontustik Qazaqstan сайты
Елордада өтетін айтулы мерекеге шетелден жүз мыңнан аса турист келеді деп жоспарланып отыр. Бұл көңіл қуантады, әрине. Өйткені бұл ел туризміне біраз серпін береді. Деректерге сүйенсек, Қазақстан туризм бағыты бойынша 85 елдің ішінде 84-орында тұр. Осы бағыт бойынша Мемлекет басшысы Қасым-Жомарт Тоқаев Үкімет пен Парламентке бірқатар тапсырма берген. Аталған бағытта атқарылып жатқан жұмыс жөнінде «Kazakhstan tours» тур агенттігінің басшысы Әсемгүл Оспанова айтып берді.
– Мемлекетіміз туризм саласына баса назар аударып, кейінгі жылдары ауқымды іс-шаралар қолға алынып жатыр. Жасыратыны жоқ, бірнеше жыл бұрын халықтың басым көпшілігі шетелге саяхаттайтын. Шетелден келетін туристер саны да аз еді. Қазір еліміздегі туристік жерлерге сұраныс көбейді. Бұл – жақсы нәтиже. Алда болатын Көшпелілер ойыны да туризм саласына тың серпіліс әкеледі деп есептеймін. Себебі елімізге мыңдаған туристің бір мезетте келуі – сирек болатын жағдай. Бұл ойындарға біздің қызметкерлер дайындықты бастап кетті. Еліміздегі көрікті жерлердің тізімін жасап, әртүрлі бағыттағы экскурсияны әзірлеп отырмыз. Туристерге қазақ, орыс, ағылшын және араб тілінде қызмет көрсетеміз. Бастысы шетелден келетін қонақтарымызды қызықтыра алуымыз керек. Сол себепті әлеуметтік желілерді белсенді жүргізіп жатырмыз, – деді Ә.Оспанова.
Көшпелілер ойындары елдің туристік әлеуетін арттырып, саладағы кәсіпкерлік қызметті жандандыруға серпін беретіні сөзсіз. Сонымен қатар кәсіпкерлердің жаңа нарыққа, жаңа кеңістікке шығуына мүмкіндік береді. Олай дейтініміз, туризм – қызмет көрсетуден басқа, елдің экономикалық, рухани әлеуетін арттыратын факторлардың бірі. Әлем қызыға қарайтын бұл ойындар кезінде туристердің қауіпсіздігі де маңызды. Бұл жөнінде V Дүниежүзілік көшпелілер ойындарын дайындау және өткізу жөніндегі дирекция басшысының орынбасары Абылай Қондыбаевпен әңгімелескен едік.
– Ойынға қатысушылардың, қызмет көрсетуші тараптың және көрермендердің қауіпсіздігі – V Дүниежүзілік көшпелілер ойынын ұйымдастырудағы негізгі ұстанымдардың бірі. Дүниежүзілік ауқымды іс-шараға дайындық жұмыстары жоспарға сай тиісті деңгейде жүріп жатыр. Астана және Алматы сияқты ірі қалаларда қызмет көрсету, демалыс орындары мен мәдени ошақтар, тамақтану, қонақүй қызметі, көлік пен қауіпсіздік мәселелері жүйелі түрде шешілген. Десек те, Астана қаласы әкімдігі, Ішкі істер министрлігімен, Ұлттық қауіпсіздік комитеті, Қорғаныс министрлігі және мемлекеттік күзет қызметімен бірлесе отыра ойын өту кезінде толық қауіпсіздікті қамтамасыз ету іс-шаралары бойынша жоспар құрылды. Сайыс болатын барлық спорттық нысан іс-шара басталмас бұрын алдын ала арнайы тексеруден өткізіледі. Нысан аумағына қарасты барлық жер арнайы құралдарымен және қол жүгін тексеретін қондырғылармен жабдықталады. Ойындарды басқару орталығы құрылады. Осы режім арқылы бейнекамералар мен арнайы құрылғылар орнатылып, цифрлық технологияның мүмкіндігін барынша қолданбақпыз. Қоғамдық қауіпсіздіктен бөлек тағы бір үлкен рөл атқаратын ол – төтенше жағдайлардың, өрт қауіпсіздігінің алдын алу. Бұл үшін арнайы техника мен тиісті қызметтердің бекеттері қойылады, – деді А.Қондыбаев.
Ендеше, қыркүйек айының 8-14 аралығында өтетін ойын туризм саласына жаңа леп алып келеді деп ойлаймыз.
Еркеназ ҚОРДАБАЙ,
Л.Н.Гумилев атындағы ЕҰУ студенті
