Тест

 тапсыратындар қай пәнді көбірек таңдайды? Мамыр айы келді дегенше мектеп бітіруші жас­тардан маза қашады. Алда – үлкен сынақ. Маусымның алғашқы күндерінде басталып, бел ортасына дейін созылатын бұл сынаққа соңғы дайындықтар қызу жүруде. Әр түлектің жүрек­тері лүпіл қағып, кеуде­лері үмітке толы. Биыл жамбылдық 44 мектеп біті­руші халықаралық олимпиадалар мен ғылыми жобалардың жеңім­паздары ретінде ұлттық бірың­ғай тестілеуді тапсырудан босатылады. Сондай-ақ, 220 оқу­шы «Алтын белгіге», 84 оқушы үздік аттестатқа үміткер. 64  мектеп бітіруші мемлекеттік грант ие­герлері. Және 2496 мектеп бітіруші дәстүрлі емтихандар тапсырады. Аудандарда мектеп бітірушілердің ұлттық бірыңғай тестілеуін ұйым­дасқан түрде өткізу үшін олардың тамақ­­тануына, тасы­мал­дауына және жатын орнына 16 млн. 990 мың теңге бөлінген. Өткен жылы тестілеуде жам­былдық мектеп түлектері арғы жылға қарағанда өздерінің жақсы дайындықтарын көрсеткен болатын. Яғни, облыстың орташа балы – 78,6-ны құрап, 2014 жылмен салыстырғанда 6,2 балға өскен-ді. Міне, осы ҰБТ-да жоғары нәтиже көрсеткен Тараз қаласындағы №1, 40, 41, 45 гимназиялары мен облыстық дарынды балаларға арналған 3 мектеп-интернаттың базасында осы білім ошақтарының озық іс-тәжірибелері таратылды. – «EDTECH-KZ» Халықаралық білім орталығы өкілдерінің қаты­­суымен 2015 жылдың қарашасы мен 2016 жылдың наурыз айларында 10, 11 сынып оқу­шылары арасында 2 рет тестілеу өткізіп, оған 18 493 оқушы қатысты, – дейді Өңірлік ком­муни­кациялар қызметінде өткен брифингте Жамбыл облыстық білім бас­қар­масы басшысының орынбасары Жәмила Бекбатырова. – Тест нәтижесі бойынша оқушылардың таңдау басымдығы – биология, физика, география, ағылшын ті­лі пәндеріне берілгендігі анық­талып,  ҰБТ көрсеткішінің өсуі осы пәндерді сапалы оқытуға қатысты екендігіне, техникалық қателіктерге жеткілікті мән беру жөнінде ұсыныс берілді. Жалпы алғанда, 2015-2016 оқу жылында Жамбыл облысындағы 316 жалпы білім беретін орта мектеп 8561 оқушы бітіргелі отыр. Соның 6065-сі, яғни 70,85 пайызы ҰБТ тапсыруға өтініш берген. 6065 оқушының 35,6 пайызы қала, 64,4 пайызы ауыл мектептерінің түлектері екен. Ендеше, іске сәт, жас түлектер! Оралхан ДӘУІТ, «Егемен Қазақстан» Жамбыл облысы