Қостанай жұрты Қобыланды батырмен қауышты

Қостанай қаласының қақ төрінде туған жердің айбарын­дай Тайбурылына мініп, қолы­на көк сүңгілі найзасын ұста­ған Қобыланды батырдың еңселі ескерткіші бой көтерді. «Қо­бы­ланды батыр» жырын оқымаған қазақ кем шығар. Қазақтың хас батыры әр қазақтың жадында ерлік пен елдіктің нышанындай жазылып қалған. Бой көтерген ескерткіші туған жердің әр сүйем жерін сыртқы жаудан қорғаған халқымыздың бар батырының бейнесі секілді елестейді. Еліміз Тәуелсіздігінің 25 жылдығы тойланатын жылы ұлттық рухты аспандататын мұндай мазмұнды ескерткіштің Арқа төрінен орын алуы заңды еді. – Еліміздің тәуелсіздігі, жері­міздің амандығы үшін күрескен ұлы бабалар ерлігін дәріптегенде ғана жас ұрпақты елдікке тәрбиелейміз. Сонда ғана тәуелсіздігіміз баянды, Мәңгілік Ел боламыз, – деді ес­керткіштің ашылу салтанатында Қостанай қаласының әкімі Базыл Жақыпов. Белгілі академик Сағындық Сатыбалдин, Саға­дат Нұрмағамбетов атындағы қайырымдылық қорының прези­денті Махмұт Нәлібаев Қостанай жұртын құттықтаумен бірге, қор­дың осындай игілікті істерге мұрын­дық болып отырғанын тілге тиек етті. Бүгінде қордың елі­міздің алты облысында филиалы бар. Демеушілер жинаған қар­жының арқасында Жамбыл, Оңтүстік Қазақстан, Қызылорда облыстарында Қажымұқанға, Иман­жүсіпке ескерткіштер орнатылды, өзге де қайырымдылық істер тындырылды. Міне, Қобы­ланды батырға орнатылған зәулім ескерткіш те қордың Серікбай Бейсетаев басқаратын Қостанай бөлімшесінің атқарған жұмыстары негізінде жүзеге асты. Тамаша туындыны мүсіншілер – ағайынды Әбдікәрім және Әбдімүтәліп Ахметовтер жасап шықты. Қазақ халқының мәңгілік ерлік өнегесіне айналған, орта ға­сыр­дың Алтын орда, Ноғай орда­сы дәуірінің аса көрнекті тұлғасы Қо­быланды батырға ескерт­кіш орнатылуына орай ұйым­дастырылған республикалық ғылыми-прак­тика­лық конференция жалпы жи­налған жұртшылыққа та­ғы­лымдық жағынан үлкен әсер етті. Оған елі­мізге белгілі жазушылар, тарих­шы ғалымдар қатысып, терең де мазмұнды баяндамалар жасады. Нәзира ЖӘРІМБЕТОВА, «Егемен Қазақтан» ҚОСТАНАЙ