Таяуда Мәскеу қаласында кәсіпкерлер құқығын қорғау жөніндегі өкілдердің жалпыресейлік конференциясы өтті. Аталған жиынға ресейлік әріптесі Борис Титовтың шақыруымен қазақстандық бизнес-омбудсмен Болат Палымбетов қатысып, конференция барысында тараптар «Өзара іс-қимыл және ынтымақтастық жөніндегі» меморандумға қол қойды.
Қазақстан мен Ресей арасындағы қарым-қатынас әлімсақтан жүйелі жолға қойылғаны белгілі. Десе де, қазіргі экономикалық қиындықтар кезінде өзара бірлесіп шешетін күрмеулі мәселелер де жоқ емес. Осы тұрғыдан алғанда екі ел кәсіпкерлерінің құқығын қорғаушы институттардың ынтымақтастығы қос тарап үшін де тиімді болмақ.
Басқосуда Ресей Федерациясының кәсіпкерлер құқығын қорғау жөніндегі өкілі Борис Титов бизнесті дамыту бойынша екі елдің тығыз қарым-қатынаста болуының маңыздылығына тоқталып өтті. «Егер макроэкономика, Қазақстандағы экономикалық және іскерлік ахуал жөнінде айтар болсақ, Қазақстан біз үшін үлгі мемлекетке айналды десе болады. Олай дейтін себебім, қазіргі таңда біздің алдымыздан шығып отырған көптеген мәселелер Қазақстанда әлдеқашан тиімді әрі жедел шешімін тапқан. Сондықтан кәсіпкерлер құқығын қорғау жөніндегі уәкіл ретінде өз тәжірибемізбен бөлісе отырып, бір жағынан көп нәрсені Қазақстаннан үйренуімізге тура келеді. Атап айтқанда, бұл аталған мемлекеттің экономикалық саясаты мен салық жүйесіне, бизнесті қорғау және тағы басқа көптеген мәселелерге қатысты», деді Б.Титов. Оның айтуынша, Ресейде соңғы кезде бизнес-омбудсмен институтының көмегіне жүгінушілер саны күрт көбейген. Бұл бір жағынан аталған құрылымға деген сенімнің артқанын білдірсе, әрі бүгінгідей қысылтаяң кезде екі елге де ортақ мәселелердің көбейгенін аңғартса керек.
Болат Палымбетов өз баяндамасында қазақстандық кәсіпкерлердің ресейлік контрагенттерге қатысты шағымдары бар екенін атап өтіп, осыған орай көрші елдің құзырлы органдары тарапынан тиісті ықпал ету шаралары қажеттілігіне тоқталды. Сол сияқты дәл осындай шағымдар ресейлік бизнесмендерден де түсіп тұратынын атап өткен ол бұл мәселелерді өзара тиімді түрде шешудің маңыздылығына назар аударды.
«Жауапкершіліктің аты – жауапкершілік және ол заңға сәйкес орындалуы тиіс. Мәселен, біз ресейлік кәсіпкерлердің барлық шағымдарын қарастырып, қазақстандық контрагенттермен байланысамыз да мейлінше жедел түрде барлық ақпаратты беріп отырамыз», деді Б.Палымбетов. Өз кезегінде қазақстандық уәкіл ресейлік әріптестеріне екі ел кәсіпкерлеріне қатысты қалыптасқан күрмеулі мәселелердің жедел әрі тиімді шешілуіне ықпал етіп отырғандары үшін алғысын жеткізді. «Ресей құқық қорғау органдарының кейбір заң бұзушылықтарға қатысты сотқа дейінгі тергеу жұмыстары кезінде қазақстандық кәсіпкерлердің қаржысы қайтарылған оқиғалар болды. Жергілікті бизнес-омбудсменнің көмегінсіз мұндай нәтижеге қол жеткізу мүмкін емес екенін атап өту керек», деді ол.
Шет мемлекеттерде қиындыққа тап болған ел кәсіпкерлері енді бизнес-омбудсменнің көмегіне жүгіне алады. Көп жағдайда негізгі мәселелер шетелдік серіктестердің тауар жеткізу мен қаржылық міндеттемелерді толық орындамауы салдарынан туындап жатады. Болат Палымбетовтің айтуынша, қазақстандық кәсіпкерлер мұндай күрмеулі мәселелерде қайда жүгіну керек екенін білгені жөн. «Бүгінгі басқосудың мақсаты да осы. Қазақстандық бизнесмендер шетелде бизнеске қатысты қандай да бір құқық бұзушылыққа тап келсе, біздің көмегімізге сүйене алатынын білуі тиіс», деді кәсіпкерлер құқығын қорғау жөніндегі қазақстандық уәкіл.
Болат Палымбетов қазірдің өзінде еліміздің алты өңірінде болып, атап айтқанда, Батыс Қазақстан, Ақтөбе, Ақмола, Қызылорда, Алматы, Шығыс Қазақстан облыстарында және Алматы, Астана қалаларында аймақ басшыларымен, прокурорлармен және кәсіпкерлермен кездесіп, жергілікті жердегі түйінді мәселелермен танысты. Кәсіпкерлерді жеке қабылдап, олардың мұң-мұқтажын тыңдап, қордаланған мәселелерді мемлекеттік органдармен бірлесе отырып шешудің жолдарын қарастыруда. Сондай-ақ, Бас Прокурормен, Жоғарғы Сот Төрағасымен кездесіп, бизнес қауымдастықтың түйткілдерін талқылады.
Ұлттық кәсіпкерлер палатасы жасаған сараптамалық деректерге сүйенсек, қазірде еліміздегі кәсіпкерлік саласының қордаланған ең өзекті мәселелері – жер, құрылыс, салық, экологияға қатысты. «Бұл проблемаларды шешу үшін бүгінгі дағдарыс, мұнай бағасының құлдырауы кезеңінде бизнес пен билік арасындағы өзара түсіністік айқын болуы керек», деді Болат Палымбетов.
Сұңғат ӘЛІПБАЙ,
«Егемен Қазақстан»