Астанадағы ақылы тұрақтар

үшін қала әкімідігі 250 телім бөлмекші  Астана қаласында коммунал­дық ақылы көлік тұрақтарын ашу мәселесі қаралды. Осыған байланысты тиісті талдау жұмыстары жүргізілді. Соның нәтижесінде ақы төлеп, көлік қоюға болатын 259 учас­ке анықталды. Олар­дың шекарасы екі жолмен – жол белгілерімен және белгілеу арқылы белгіленеді. Астана қаласы жолаушылар көлігі басқармасының басшысы Еділ Сүлейменовтің айтуынша, техникалық мәліметтер бойынша 40 тұрақ орнына 1 паркоматтан келеді. –Жобаға кіретін жабдықтарға паркоматтар, мобильді қосымша, ақпараттандыру жүйесі, тетіктер мен төлем жасауды бақылау жүйесі жатады. Астана ЛРТ компаниясымен бірге инвестормен келісім жасалады. Бұл жағдайда бюджет қаржысы емес, тек инвестициялық қаржы ғана жұмсалады, – деді ол. Аталған жоба екі кезеңге бө­лінеді. Бірінші кезеңде қаланың сол жағалауында – «Нұржол» желегінің, Ақмешіт пен Түркістан көшелерінің бойында 910 ақылы тұрақ орны пайдалануға беріледі. Бірақ, бұл кезеңде Қоғамдық кеңес мүшелері мен Астана қаласының мәслихаты депутаттарының ескертулерін ескере отырып, аталған учаскелердегі тұрақтар тестілік режімде жұмыс істейді. Ал жүйе техникалық жағы­нан толығымен сынақтан өтіп болған соң ақылы болады. Қазіргі кезде коммуналдық ақы­лы тұрақтарды пайдалану үшін тарифті есептеу жүргізілді. Белгіленген баға барлық шығын­дарды толық өтеуге кепілдік беріп, рентабельділікті қамтамасыз етеді. Есептеулер бойынша, бір сағат үшін тариф 182 теңге болады. Бірақ жобаның әлеуметтік маңыздылығын ескере келіп, базалық тарифті саға­тына 150 теңге мөлшерінде белгілеу ұсынылды. «Аталған жобаның мақ­­саты ақы алу, бюджетті толық­тыру емес, көше-жол желісіне тү­сетін жүк­темені азайту»,  – деді Е.Сүлейменов. Астана қаласы қоғамдық кеңе­сінің мүшелері жобаны ешбір ескертусіз қабылдады. Дастан КЕНЖАЛИН, «Егемен Қазақстан»