Жақында ғана елордада миллионыншы болып туған Саида есімді сәбиді Алматы қаласының миллионыншы тұрғыны Бауыржан Дәулетұлы құттықтады.
– Саида бұл өмірдегі ең бақытты, ақылы көркіне сай сұлу қыз болсын деп тілеймін! Кішкентай балапан көпшілікке үлгілі азаматша болады деген үміттемін, – деді Алматы қаласының тұрғыны.
Бауыржан 1981 жылы 19 желтоқсанда туған. Сол тұста оған «Алматы қаласының миллионыншы тұрғыны» деген алқа тағылып, қаланың символдық кілті табыс етілген. Мұндай қуанышты жағдайға байланысты даңқты батыр Бауыржан Момышұлы батасын берген екен.
– Бауыржан деп атын қойған сәбиге батамды беремін. Дені сау жігіт болып, елінің мақтанышына айналсын! – деген еді батыр.
– Ешқандай ерекшелігім жоқ, қарапайым жігітпін. Мені сүйікті қаламның миллионыншы тұрғыны ретінде емес, осы қалпыммен қабылдағандарын қалаймын. Ал қаланың кілтіне келер болсам, ол Алматыдағы 28 гвардияшы-панфиловшылар мұражайында сақтаулы тұр, – деді Бауыржан Дәулетұлы.
Айта кетейік, 4 шілде күні Астана қаласы миллион тұрғыны бар қалаға айналды. Саида деп есімі қойылған перзент Арайлым және Олжас Мұхамедияровтардың тұңғышы. Қала әкімі Әсет Исекешев жас жұбайларды құттықтап, жаңа пәтердің кілтін табыстады.
Аян ӘБДУӘЛИ,
«Егемен Қазақстан»