Бас прокуратура тиімді бәсекелестік бойынша еліміздің барлық облыстарынан жұмысқа жаңа 180 қызметкер алуға ниетті. Бұл туралы ведомствоның кадр жұмысы департаментінің бастығы Александр Огай Астанадағы баспасөз-конференциясында мәлім етті.
Биылғы жылдың алғашқы тоқсанында Ақмола облысында 300-ге тарта қайырымдылық шарасы өткізіліп, 200 миллион теңге қаражат жиналған. Бұл туралы Көкшетаудағы «Қоғамдық келісім» үйінде Ақмола облысының әкімі Сергей Кулагиннің қатысуымен өткен Қазақстан халқы Ақмола облыстық Ассамблеясының XIX сессиясының отырысында айтылды.
Шығыс Қазақстан облысының Зайсан ауданында табиғи газды өндіру көлемі 6,2 пайызға көбейді. Биылғы қаңтар-мамыр айларында аталған аймақтағы кәсіпорындардың өнім шығару көлемі 2530,5 млн. теңгені құрады. 2015 жылдың сәйкес кезеңінде физикалық индекс көлемі өңдеу өндірісінде 130,0 пайызды, тау-кен өндіру өнеркәсібінде 104,9 пайызды құраған.
Ертіс өңіріндегі «Павлодартұз» ЖШС өндірістік қуаттылығын 150 мың тоннаға дейін ұлғайтуды көздеп отыр. Қазіргі таңда аталған кәсіпорын тұзды Үлкен Қалқаман көлінен алады. ЖШС директоры Денис Семеновтің айтуынша, биыл 85 мың тонна тұз өндіру жоспарланған.
Солтүстік Қазақстан облысында биыл 1,7 млрд. теңгенің 2 астық қоймасын ашу жоспарланған. Облыс бойынша «ҚазАгро» холдингінің инвестициялық қоржынында құны 19,3 млрд. теңгенің 54 жобасы бар. Бүгінгі таңда оның ішіндегі құны 17,64 млрд. теңгенің 52 жобасы пайдалануға берілді.
Қарағанды облысында денсаулық сақтау мен АӨК саласында 6 жоба мемлекеттік қолдауға ие болды. Аталған жобаларды жүзеге асыру арқылы 43 жаңа жұмыс орнын ашып, 120 жұмыс орнын сақтап қалуға мүмкіндік бар.
Жайық өзеніне 2,6 млн. дана бекіре тұқымдас балықтың шабақтары жіберілді. Оның ішінде 900 мың данасы – бекіре және 1,7 млн. дана – шоқыр шабағы.
Хабарлар Үкімет, облыстық әкімдіктер сайттары, «ҚазАқпарат» агенттігі, «Хабар» телеарнасы материалдары бойынша дайындалды