Ақпараттар ағыны

Еуразиялық экономика­лық комиссия медициналық бұйымдарды ортақ нарыққа шығару үшін Еуразиялық эко­номикалық одақтың нор­мативтік базасын құруды аяқтады. Құжат медициналық бұйымды қолданудағы мін­дет­ті талаптарды қолдану тұрғы­сынан құқықтық реттеу қарым-қатынасын орнатады. Сонымен қатар, ЕАЭО елдерімен сарап­таманың бұл талаптарға сәйкес­тігін жүргізеді. «ЭКСПО-2017» ұлттық компаниясы отандық тур­опера­торлармен бірлесе оты­рып, Қазақстан бойынша 73 турис­тік маршрут әзірледі. Көрмеге келген әрбір турист Елорданың көрікті жерлерімен танысып қана қоймай, Қазақ­станның тарихи және мәдени нысандарын көру мүмкіндігіне ие болады. «Азаматтарға арналған үкімет» қызмет көрсету сапасын әрі қарай арттыру шараларын қабылдауда. Филиалдар қызметін бағалау үшін KPI деп аталатын «Негізгі тиімділік көр­сеткіштері» әзірленді. Мұнда мемлекеттік қызметтерді элек­трон­дық форматта көрсету үлесі, композиттік қызметтерді ендіру, фронт-офистерді жаң­­ғыр­­ту көрсеткіштері ұсынылады. Жылжымалы медицина­лық кешендер 7 облыстың шал­ғай аудандарына барады. 20 маусым мен 20 шілде ара­лы­ғында облыстық туберкулезге қарсы диспансер маман­­дары Батыс Қазақстан облы­сы­­ның Ақжайық, Теректі, Қаз­талов, Бөрлі аудандарында флюоро­гра­­фия­лық тексеру жүргізеді. Оңтүстік Қазақстан об­лысы Шардара ауданында 1 мың гектардан астам егістік ал­қабы қайта айналымға қо­сыл­­­мақ. Атап айтсақ, Қ.Тұрыс­­­беков, Қоссейіт, Көксу ауы­л­дық округтерінде жалпы ұзын­дығы 94,4 шақырым канал­ды жөндеуден өткізу жос­парланып, бүгінге дейін оның 76,9 шақырымы қайта қалпына келтірілді. Сонымен қатар, 110 дана ағын су тоспаларының 61-і жаңартылды. Биыл Ақтөбе облы­сын­да «Жұмыспен қамтудың жол картасы-2020» бағдар­лама­сының бірінші бағытын іске асыруға республикалық бюджеттен 1,9 млрд. теңге бөлінді. Осы қаражат есебінен 49 инфрақұрылымдық нысан­ды жөндеу жоспарлануда, оның 45-і күрделі жөндеу және 4-і ағымдағы жөндеуден өтеді. Жөнделетін ғимараттардың 37-сі білім беру, 6 денсаулық сақтау, 5 мәдениет және 1 дене шынықтыру нысаны.  Хабарлар Үкімет, облыстық әкімдіктер сайттары, «ҚазАқпарат» агенттігі, «Хабар» телеарнасы материалдары бойынша дайындалды